長假開始又係煲劇嘅時候～精選5套2017年已完結日劇～懸疑、熱血、感人、暗黑題材通通有

放長假有咩做？梗係煲劇啦～2017年有好多日劇口碑唔錯，今次精選5套日劇畀大家，要熱血有熱血，要感人有感人，要查案亦都有，想睇愛情故事亦有，連暗黑出軌題材都有，總有一套啱你睇，陪你過過新年！

放假煲劇就最忌要追，最好就係睇已經完晒、唔駛畀人吊住條癮嘅劇集！以下排名不分先後～

陸王

Photo from twitter@rikuou_tbs

唔少人睇完話「剩係著鞋呢個動作都可以令人感動到喊」的日劇，改編自《半澤直樹》作者另一套作品，故事講述製造足袋（分趾鞋襪）嘅百年小店「小鉤屋」，因為愈嚟愈少人著足袋，所以為咗生存就要去試下開拓新產品。

Photo from twitter@rikuou_tbs

睇馬拉松比賽被就算腳傷都想要爬起身再跑嘅選手茂木裕人所感動，從中知道原來好多跑長跑嘅人都因跑姿而受傷。當中發現製造足袋嘅技術，可令人著上去跑起嚟用無咁易受傷嘅跑姿，想設計「著咗好似無著咁舒服嘅足袋跑鞋」，就開始由零開始研究，希望總有一日茂木選手著佢地嘅鞋跑步。

Photo from twitter@rikuou_tbs

由設計諗到去製造物料，睇到一啲都唔容易，仲受到好多外在壓力，好似銀行唔想融資，仲希望小鉤屋可以精簡架構（即係裁員)，唔係就唔借貸畀佢地。而跑鞋龍頭公司都隱約感覺到睇落好似殘殘舊舊嘅細公司有機會威脅到佢地，從中施壓。

Photo from twitter@rikuou_tbs

透過劇情睇到一間傳統小企業搏命想研究出創新舒服嘅足袋跑鞋，就算受到多方壓力，資金短缺，幾艱難都好，一大班人都咬實牙關去做，齊心協力熱血去做呢件事，睇到茂木著住嚟跑個下，發現原來著鞋都可以令人眼濕濕！

Photo from twitter@rikuou_tbs

四重奏

Photo from TBS

喺日本收視唔算好高，但口碑就極好～因為呢4個人雖然無血緣關係，各自收埋唔同嘅秘密，仲有好複雜嘅四角戀，但佢地就好似一家人咁。呢套劇出現好多金句都好到肉，而且仲會令人有共鳴到有少少心酸咁……

Photo from TBS

呢4個30幾歲嘅男女喺偶然情況一齊相遇，仲組合成四重奏演奏團體「Doughnuts Hole」，住埋同一間屋到，慢慢會發現到原來每個人都收埋咗唔同嘅秘密。故事中講出我地日常生活都會遇到嘅情況，由角色口中聽到，會畀人有好多反思。

Photo from TBS

「你知道比悲傷更令人悲傷的事情是什麼嗎？是空歡喜。」、「夫妻就是可以分開的家人。」、「20多歲的夢想，讓人閃閃發亮，30 多歲的夢想，卻讓人黯淡。」

Photo from TBS

但佢地之間由陌生人、互相隱瞞，慢慢相處到好似一家人咁，大家為對方著想咁，會令人睇到又笑又喊仲幾溫暖添～

產科醫鴻鳥2

Photo from twitter@kounodori_tbs

如果想睇感人嘅《產科醫鴻鳥2》會係個唔錯嘅選擇，如果有睇第一季都知係套好溫暖嘅劇集，不過今季描述更多嘅係因為能力問題，對生命流逝嘅無可奈何、唔甘心、悔恨。而故事中好多情節都扭轉咗我地一般嘅想法。

Photo from twitter@kounodori_tbs

例如話女強人媽媽由有咗到生咗，一直心掛掛公事，好想快啲返工作崗位，湊小朋友又未如理想，令到佢開始產後抑鬱，當佢老公話「我都會『幫你』照顧孩子」，劇中嘅醫生就冷淡咁講咩叫「幫」？個小朋友佢都有份。我地好少會咁考究一句說話，但原來對對方嚟講係一個大問題。

Photo from twitter@kounodori_tbs

而且當同產婦開始深交，遇到生離死別，就會諗起當初如果注意到細節，對方可能就唔會死～劇情再配合插曲，真係會令人眼濕濕……

只有我不在的城市

人氣同名動漫改編，之前都有電影版，後來Netflix將佢拍成電視劇，伏線同舖墊多咗細緻咗～故事係講一個無咩名氣嘅漫畫家藤沼悟為生計兼職做pizza外賣速遞員，但其實佢有個「奇異」能力，就係一有大事發生，就可以被動或主動咁「倒帶」返到過去，改變過去。

Photo from 「僕だけがいない街」製作委員会

但有次喺街道因為一單兒童誘拐而「倒帶」，佢叫身邊嘅母親留意下周圍有無怪事，點知就令到阿媽惹嚟殺身之禍。為咗要挽回阿媽條命，佢搏命要「倒帶」，點知一返過去就返咗去小學6年班個時，即係代表阿媽今次嘅死係同6年班嘅事有關。

Photo from 「僕だけがいない街」製作委員会

Photo from 「僕だけがいない街」製作委員会

原來藤沼6年班嘅時候，班上面兩個同學都因為畀人誘拐而死，而呢個城市仲有幾個小學生都係被發現失蹤被殺，屬於連環誘拐殺人案，當時已經拉到犯人，但藤沼一直覺得個大哥哥唔係兇手，而佢深信今次「倒帶」都係要佢阻止誘拐案發生，先至可以返到去本來嘅時空，令到阿媽唔會死……

Photo from 「僕だけがいない街」製作委員会

呢套無論係成年演員定係小朋友演員都做得自然，而且感覺到兇手同童年定成年嘅藤沼都不停鬥智，會令人好想知藤沼係可以「預知未來」嘅情況下，會唔會扭轉到命運，同埋兇手到底係邊個。

其實並不在乎你

Photo from TBS

呢套係繼人妻出軌日劇《晝顏》之後另一套討論度好高嘅偷食劇集，同《晝顏》唔同嘅係呢次擺明就講女主角人妻渡邊美都係佢自己貪心，而且劇情慢慢見到老公由好男人開始變成一個妒忌心好重、好似好恐怖嘅人，仲會對付「情夫」，而「情夫」個老婆又暗地裡對「情夫」施壓，會令人想睇落去知道美都會有咩下場。

Photo from TBS

Photo from TBS

明明個老公有份好職業，一心一意對佢，仲會日日煮埋飯畀佢食，對佢無微不至，無論美都點對佢，佢都一直愛住美都。但就算老公幾好都好，美都都係諗老公係佢人生「第二位」鍾意嘅人，時不時諗返起中學時期無疾而終嘅男同學。

Photo from TBS

美都重遇返呢個男同學有島光軌，無同對方講自己已經結咗婚，而有島仲帶咗佢去開房，佢又真係跟人去喎。就算後來有島同佢去偷食溫泉之旅，話因為老婆要生，所以要走，當時美都先知原來佢結咗婚，仲show畀有島睇佢都結咗婚，所以唔駛擔心，可以繼續呢種關係。

Photo from TBS

Photo from TBS

睇到呢到，相信你都會第一下「what？！」，但之後美都嘅老公同有島嘅老婆都各自「出招」，劇情會吸引觀眾想知呢兩個偷食嘅人會有咩後果。

Photo from TBS

Photo from TBS

圖片來源：twitter@rikuou_tbs ／twitter@quartet_tbs ／ twitter@kounodori_tbs ／ 「僕だけがいない街」製作委員会

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載