三月對鍾意文化藝術嘅朋友黎講，可以話係好重要嘅月份，因為年度盛事香港影視娛樂博覽載譽歸來喇～
今年黎到第14屆，歷時接近一個月嘅博覽將會有一連串嘅活動，電影、電視、音樂及同埋數碼娛樂元素將會喺九個大型活動一一呈現：香港國際影視展、香港國際電影節、香港電影金像獎頒獎典禮、香港亞洲電影投資會(HAF)、香港亞洲流行音樂節(HKAMF) 、ifva獨立短片及影像媒體節、數字電影特效高峰論壇、數碼娛樂論壇，以及電視世界國際論壇。
作為鍾意文化活動嘅朋友，一定唔可以錯過當中3個公眾都可以參與嘅活動！
1.香港亞洲流行音樂節
日期：2018年3月23日
亞洲流行音樂節已經係第8年舉辦，今年會有九個地區嘅巨星同參與競賽新星歌手參與，包括中國內地、南韓、日本、台灣、新加坡、馬來西亞、香港、泰國及新加入的越南，大家可以趁呢個機會欣賞到平時唔會有機會接觸到嘅音樂～
除咗一班新歌手，大會都會邀請各地嘅當紅歌手擔任表演嘉賓，當然大部分fans都會放眼日韓台三地嘅歌手，好似今年就有韓國嘅男團BtoB、日本嘅女歌手中島美嘉、台灣嘅徐佳瑩等等，當然唔少得香港代表Supper Moment，都係一個難得嘅機會欣賞偶像表演，一個show可以睇到咁多唔同種類嘅音樂，大家齊齊因為音樂而聚集埋一齊，你話幾開心呢！
Photo from Pinterest
2.第四十二屆香港國際電影節
日期：2018年3月19日-4月5日
電影迷一定唔可以錯過呢個香港最大型、亦都係亞洲最悠久嘅電影盛事，每年嘅國際電影節搜羅黎自 55 幾個國家、超過 250 部作品，好似啱啱喺柏林影展得獎嘅作品都將會喺今屆電影節上映，想睇一D非主流嘅電影，或者其他國家嘅小本製作，一定要mark實呢期啦～
今年都依然會有唔少嘉賓黎香港同大家分享，日本殿堂級女星香川京子同埋日本紀錄片大使原一男會同各位影迷見面。
另一焦點係名導蔡明亮嘅《家在蘭若寺》，係佢首部 VR 華語電影，用超真實嘅感覺去投入導演嘅藝術電影裡面，必定有另一番體會，導演同金馬影帝李康生仲會黎香港同大家探討電影添。
3.ifva獨立短片及影像媒體節
日期：2018年3月6日-20日
對於拍攝有濃厚興趣嘅朋友，呢個活動一定係必去！因為你可以欣賞到唔同種類嘅獨立短片、動畫，本地同外國嘅作品都有，睇完短片你仲可以參加唔同嘅工作坊，體驗一下新嘅拍攝科技同剪接模式，對將來想投身電影業嘅朋友有好大幫助。
小編覺得影像媒體節有D似去藝術館睇藝術品咁，但內容更加豐富，作品會利用同媒體有關嘅物品去表達心中所想，內容包含藝術、社會、民生等等，欣賞完之後應該會有好多唔同嘅睇法。
4.第三十七屆香港電影金像奬頒奬典禮
日期：2018年4月15日
無論係演藝人定市民，金像奬都係大家好關心嘅盛事～支持香港電影業，當然都要支持埋個頒獎禮啦～睇頒獎禮嘅另一焦點就係主持人，今屆金像獎將會由張繼聰同蔡卓妍拍住上，感覺都幾新鮮，相信到時候應該會有唔少笑料！
至於大家最關心嘅男女主角獎項，古天樂同鄧麗欣都分別入圍角逐影帝影后嘅獎項，今年鄧麗欣做咗好多唔同嘅嘗試，到底佢可唔可以初嚐影后滋味，大家記得睇電視支持下，亦係支持金像獎，同電影工作者一齊分喜悅～
Photo from 《貪狼》
Photo from 《空手道》
Text: Holiday editorial
*本文章的圖片均經其本人或其公司授權，其他媒體不得轉載
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
