官方：日本《吉卜力》樂園2022年中開幕！園區設計首度曝光，園區逐個睇！召集全體宮崎駿動畫狂迷～～～

係2017年個陣，日本愛知縣縣政府就同吉卜力工作室傾好要會用愛‧地球博紀念公園地皮，改造成為全球首個《吉卜力》主題樂園（ジブリパーク）！

岩岩官方就公佈左呢個樂園會係2022年嘅年中係愛知縣名古屋近郊長久手市開幕！！！！由200公頃公園綠地去改建而成，相信宮崎駿動畫陪住大嘅各位都會好期待～
Photo from 愛知県

而佢地更加首度公開左呢個樂園嘅設計，一共會分開5個主題園區，包括：青春之丘、吉卜力之大倉庫、幽靈之里、魔女之谷、同埋龍貓之森！
Photo from 愛知県

1/ 青春之丘
取材來自《夢幻街少女》入面曾經出現嘅地球屋，仲會可以睇到《哈爾移動城堡》場景入面嘅建築物，感覺置身係動畫世界咁！
Photo from 愛知県

Photo from 《哈爾移動城堡》電影場景

2/ 吉卜力之大倉庫
呢一個園區會係比較似休憩嘅地方，粉絲可以係入面睇到一啲吉卜力歷年黎嘅收藏品，相信可以睇到親筆手稿等等嘅珍貴電影收藏物～個度仲會會有設施播放唔少動畫！
Photo from 愛知県

3/ 幽靈之里
狂迷應該即刻就會知道係《幽靈公主》嘅主題區域啦，入面暫定會有動畫角色邪神同埋鎮西豬神可以比大家無限打卡！
Photo from 愛知県
Photo from 《幽靈公主》電影場景

4/ 魔女之谷
魔女係宮崎駿動畫經常出現嘅元素～呢個園區會有各類型結合左《魔女宅急便》同《哈爾移動城堡》元素嘅機動遊戲！小編就腦補到啲電動飛天帚把，可以一嚐做魔女嘅感覺！Photo from 愛知県
Photo from 《魔女宅急便》電影場景

5/ 龍貓之森
Last but not least，相信最注目一定係呢個園區喇！雖然原本愛‧地球博紀念公園本來已經有《龍貓》主人公草子同次子嘅屋企，但今次都會重新再翻新，整得更加似原作！所以去過嘅朋友都唔可以唔去啊～會係·重現動畫《龍貓》提倡嘅世界觀而成嘅「龍貓故鄉村」！
Photo from 《龍貓》電影場景
Photo from 愛知県

《吉卜力》主題樂園
地址：日本愛知縣名古屋愛‧地球博紀念公園
交通方法：到達「藤が丘」站／「八草」站後，轉乘接駁巴士到達「愛‧地球博紀念公園」站
電話：0561-64-1130

資料來源：愛知縣、じゃらんnet

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

*本文章的圖片均經其本人或其公司授權，其他媒體不得轉載