地表最強！小強奶營養認証～他朝盼成superfood 勁過牛油果？

小強精神就是營養，以後唔準你地再打小強～小強嘅奶營養竟然高過牛奶3倍呢！

係2016年嘅國際結晶學聯合會（IUCr）期刊中有篇文章提及：印度一個科學研究團隊（Institute for Stem Cell Biology and Regenerative Medicine）發現出有一種生活於太平洋沿岸嘅蟑螂品種，名叫「太平洋折翅蠊」（Pacific Beetle cockroach）（即「太平洋甲殼蟑螂」），係史上唯一嘅胎生蟑螂～

Photo from Shutterstock

雌性蟑螂係飼育期間會分泌出豐富蛋白質、脂肪及糖分嘅液體比體內嘅BB，入到BB體內吸收後會係膽囊轉化成結晶～重點嚟啦，呢個部分就係傳說中嘅蟑螂奶！

Photo from Shutterstock

蟑螂奶嘅營養係比牛奶高3倍，可能係世界上最高營養嘅食品啊～可以提供比人體所需嘅蛋白質、氨基酸、糖分等等～真係可以納入超級食品嘅行列啦！平時唔飲得奶、有乳糖不耐症嘅朋友都可以飲呢個營養價值及熱量奇高嘅珍品～大家真係唔洗擔心lol

Photo from Shutterstock

不過唔好講笑，想飲蟑螂奶真係唔係話咁易架！要係一千隻蟑螂身上先提取到100 ml嘅奶啊陰公～小編估計第時成功研發推出，可能產量稀有到要排長龍買添！

味道方面可能係大家嘅concern，但有份研究蟑螂奶嘅科學家Leonard Chavas真人實試後表示：味道似蜂蜜脆片雪糕喎⋯⋯

而南非一間主張食昆蟲嘅公司Gourmet Grubb好有膽色，真係推出一款叫做Entomilk嘅「昆蟲奶」，此奶不同彼奶～呢款係用「可持續養殖的昆蟲」 (sustainably farmed insects)製作 ，雖然係無咁珍貴嘅品種，但都係支持環保架！而南非市面上都已推出昆蟲奶製嘅不同口味雪糕～想try嗎？

Photo from Gourmet Grubb Facebook專頁

係泰國啊中國啲人都會當街當巷食炸昆蟲啊蝎子個啲啦，蟑螂奶算係啲咩啊～輕鬆啦！super food喎～比你揀，飲定唔飲？

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載