露台直望富士山！日本超高級「露營」體驗嘆住咖啡森林營火兼睇星！

By Jackie on 09 Jul 2018

Digital Editor

去日本旅行當然要一睹富士山嘅壯觀風貌，但有無諗過連坐喺酒店都望到？仲要唔係打側望到少少，而係直望一大座富士山啊！如果計劃去關東嘅朋友要留意啦，露台風景絕對係超誇張！但有咁大個靚景，入住價錢當然都要有返啲心理準備先好睇啦，不過睇完啲相之後，包你覺得一世人一定要草錢住一次！

Photo from Photo from hoshinoya.com

位於富士河口湖嘅「虹夕諾雅富士酒店」，係星野集團旗下一間高級渡假酒店，喱個酒店以「露營」為主，但既然稱為高級渡假酒店，當然唔需要客人喺戶外搭帳蓬露宿啦！房間以一個個方格為主，露台正對富士山，簡直可以呆坐露台全日都唔覺悶！

Photo from Photo from hoshinoya.com

房間牆身以白色為主，使光線反射令房間同露台更光猛。最重要係露台使用玻璃趟門，日間反射到整座富士山，成座富士山好似喺你隔離陪你食飯咁！超夢幻啊！露台更設有暖氈，冬天坐露台出面都唔驚凍啊！

Photo from Photo from hoshinoya.com

房間設計完全無牆壁阻隔住富士山風景，就算你瞓喺坐睇，定坐喺梳化睇，就連沖涼、去廁所，成座富士山依舊坐立喺你面前，好似幅畫咁靚，真係好奢侈啊！

Photo from Photo from hoshinoya.com

而佢嘅「露營」方式超離地，Check in時服務員會比客人喺牆上揀一款自己啱心水嘅「露營背囊」，背囊款式好文青，一啲都唔馬虎！入面裝有望遠鏡、水壺、零食、隨身座墊、薄羽絨同小型燈，之後嘅所有露營活動都可以帶住喱個背囊啦！

Photo from Photo from hoshinoya.com

除咗日本旅館常見嘅茶點服務，大家仲可以喺房內點餐，點餐後會有專人送餐上門，而餐點當中最特別嘅係，酒店為配合「露營」主題，所有嘅餐具全部都係露營用品！再坐喺露台望住富士山享用午餐，簡直係最高級嘅「露營」體驗！

試問「露營」又點止咁簡單！整間酒店被山同森林圍繞，除住宿區以外，沿山而行仲有餐廳、戶外休閒區、多用途空間等等，我諗單係酒店範圍都已經可以行足一日！

Photo from Photo from hoshinoya.com

酒店仲有提供唔同「露營」活動，例如超浪漫嘅野營，如果已經試過在房內用餐，第二朝早不妨到戶外的Cloud Kitchen享用餐點！大家可在戶外一同製作早餐，真係好有野外露營嘅感覺！

Photo from Photo from hoshinoya.com

但記得要喺Cloud Kitchen用餐係要先向職員預訂㗎，而且晚餐嘅餐桌較少，所以一定要提前預約，以免難得入到去又無得好好體驗戶外用餐嘅機會啦！

Photo from Photo from hoshinoya.com

而每日早餐同下午茶時段，可到Library Cafe免費手沖咖啡或朱古力，大家可隨自己喜好，選擇不同香料及威士忌，親自手調一杯熱朱古力/咖啡！下午茶當然唔少得燒棉花糖食啦，另外仲有提供餅乾等小食！喺寒寒冬天戶外野營，真係暖入心啊！

Photo from Photo from hoshinoya.com

如果想有更深入嘅「露營體驗」，酒店都有提供額外嘅活動，例如砍木體驗、戶外空中瑜珈班、騎馬體驗、河口湖划小船、青木原森林探險等，但記得要提早預約，同埋以上活動都係另行收費㗎，大家可以按照自己興趣選擇活動。

Photo from Photo from hoshinoya.com

重點嚟啦～究竟一間直望富士山嘅住宿要幾多錢呢？酒店嘅住宿收費有分淡季同旺季，唔好以為冬天睇富士山係旺季啊，其實夏天先係登山、避暑旺季！

所以冬天及春天去會相對較便宜，大約11-6月份為淡季，以2成人入住一晚為例，除特別日子及週末外，12-3月最平為45,456円一晚，約港幣3,230元一晚。6月相當會仲平d，最平為37,880円一晚，約港幣2,690元。如果選擇7-10月會較貴，最平都需要68,184円一晚，即約港幣4,843元，入住日數越多會越平，6日或以上更有機會低於半價，但當然一次過入住6晚都幾肉赤呢！