將為人父往外闖！陳智燊離巢望到外國發展！明言「Netflix/新加坡電影都想試」

型男陳智燊（Jason）前日喺社交網宣布離開大台，結束12年嘅合作關係！相信好多粉絲都關心Jason之後去向，原來即將榮升爸爸嘅佢係想跳出Comfort Zone ，到國外為演藝事業闖一闖，目標遠大！

Photo from Jason Chan 陳智燊@FB

唔經唔覺，現年40歲嘅Jason自2006年參加第20期藝員訓練班入行，已經喺大台工作12年！英國長大、操流利英語嘅佢，由明珠台英語節目《港生活 港享受》主持做起，漸漸晉升成為力捧小生，雖然Jason靚仔有型，但歷年能夠擔正劇集男一嘅機會唔算多。

Photo from Jason Chan 陳智燊@FB

喺近日大台「離巢潮」下，約滿嘅Jason都決定離開公司。飲水思源嘅佢亦喺Instagram上載昔日訓練班時合照，同撰文感謝樂小姐、珍姐等伯樂，栽培佢成為主持、演員，實現演藝夢想，而且表示好唔捨得合作過嘅同事。

Photo from Jason Chan 陳智燊@IG

既然公司畀到Jason咁多難忘回憶，到底係咩原因驅使佢離開呢？原來係婚後嘅事業心！

Jason近日向傳媒透露，指離巢呢個決定係由於成家立室後，自覺事業上需要「更加畀心機」，先踏出第一步離開Comfort Zone，再開拓海外市場，令事業發展更多元化，搵多啲奶粉錢！

果然，人生走到另一個階段，對自己嘅要求都有所不同！

Photo from Jason Chan 陳智燊@FB

雖然Jason近年同太太宋熙年（Sarah）不時以夫妻檔上陣，轉型拍片接騷做YouTuber，不過Jason指太太暫時未有打算離巢，只係自己就想喺演出上「試多啲嘢」，仲話「美劇、英劇、內地都好⋯⋯無論係拍Netflix或者新加坡電影咩都好」，只要「有機會表現自己演戲一面」都唔會放棄！

Photo from Jason Chan 陳智燊@FB

Jason志向遠大，不過都啱嘅，做演員最緊要勇於嘗試！

就好似前大台花旦陳法拉今年簽約美國經理人公司，進軍荷里活，足以證明香港演員喺外國一樣有市場！希望幕前經驗豐富、英語流利又靚仔嘅Jason嚟梗都可以另闖一片天啦！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載