仲記唔記得麥當勞叔叔啲朋友？漢堡神偷／小飛飛 一齊嚟回顧下佢哋！

細個去麥當勞食嘢嘅時候，好多時喺餐廳都會見到一個紅色爆炸頭嘅小丑，即係麥當勞嘅吉祥物—麥當勞叔叔。

其實除咗麥當勞叔叔之外，仲有一班好朋友，包括小飛飛、漢堡神偷同埋滑嘟嘟，佢地同麥當勞叔叔都係麥當勞嘅四大吉祥物，佢哋全部都係住喺麥當勞樂園入面。

Photo from mcdonalds.wikia.com

不過近年除咗麥當勞叔叔之外嘅其他三位都無再喺廣告中出現，令網民懷念，忍唔住問：「麥當勞叔叔啲朋友去咗邊度？」

麥當勞叔叔（Ronald McDonald）

Photo from mcdonalds.wikia.com

麥當勞叔叔係一個紅色爆炸頭著黃色衫嘅小丑，可以話係麥當勞嘅頭號代言人。

Photo from shutterstock

Photo from shutterstock

好多間麥當勞入面都會有麥當勞叔叔親自坐陣，引嚟唔少小朋友同佢合照又或者坐喺佢大髀食雪糕，非常受歡迎。

漢堡神偷（Hamburglar）

Photo from mcdonalds.wikia.com

Photo from mcdonalds.wikia.com

漢堡神偷著住黑白間條衫連斗蓬，加埋黑色眼罩，完全係hero裝扮，但原來佢其實係「奸角」。

漢堡神偷最鍾意食麥當勞，所以經常混入麥當勞開心樂園偷嘢食，不過身為反派嘅佢都為唔少小朋友帶來歡樂。

小飛飛（Birdie the Early Bird）

Photo from mcdonalds.wikia.com

Photo from mcdonalds.wikia.com

小飛飛紮孖辮，著住粉紅色工人褲，造型相當少女，所以都有好多女仔鍾意佢㗎！

小飛飛充滿好奇心，最鍾意食麥當勞早餐，喺麥當勞擔任既有活力又熱情嘅大姐姐嘅角色。

滑嘟嘟（Grimace）

Photo from mcdonalds.wikia.com

Photo from mcdonalds.wikia.com

全身紫色，好似舊大蕃薯咁嘅樣，眼神呆呆哋，原來佢最鍾意食新地同飲奶昔。

滑嘟嘟做咩都慢吞吞，但個性天真樂觀，都有唔少fans㗎！

以前細個開心樂園餐附送嘅玩具，大多數都係同麥當勞叔叔、小飛飛、漢堡神偷同埋滑嘟嘟有關，吸引好多小朋友專登去食開心樂園餐。

Photo from mcdonalds.wikia.com

麥當勞叔叔、小飛飛、漢堡神偷同埋滑嘟嘟四個仲係吉祥物嘅時候，差唔多間間麥當勞都有佢哋嘅身影，甚至仲會喺麥當勞廣告入面出現添！

Photo from mcdonalds.wikia.com

可惜近年嚟麥當勞打造品牌形象，好多鋪頭都翻新成摩登食店，麥當勞叔叔同佢嘅朋友都要退休喇。

Photo from shutterstock

Photo from shutterstock

小編細個嗰陣成日都留意開心樂園餐出咩玩具，一到嗰個日期就即刻去麥當勞食，又會好憧憬喺麥當勞開生日會。嗰陣嘅麥當勞裝修得好有樂園feel，依家嘅麥當勞比較多工作繁忙嘅都市人幫襯，連裝修都變得摩登，麥當勞叔叔雕像、蘋果樹嗰啲擺設都無晒咁滯，真係好可惜。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）