文青必去日本5大市集推介創意手作/古著舊物雜貨控掘寶之地

Digital Editor

成日去日本旅行唔知買咩手信好？不如試下行當地市集，買啲新奇小物返去比朋友。無論係古董、手作定係二手物件都可以喺日本嘅市集搵到，每一個攤位都各有自己風格，鍾意雜貨又或者想買手信嘅你一定可以喺呢搵到啱你心水嘅小物。

小編今次就為大家推介五個日本市集，大家可以喺度搵到又平又有日本風格嘅物品。

1. 集手作、音樂、美景於一身市集：井之頭恩賜公園Art Markets

Photo from 井之頭恩賜公園100年實行委員會facebook @inokashirapark100

井之頭恩賜公園Art Markets係喺井之頭恩賜公園入面舉辦嘅市集。井之頭恩賜公園係著名嘅賞櫻勝地，環境非常優美，文青行完市集仲可以喺公園打卡添！

市集有唔同種類嘅雜貨，總有一款適合你。除咗賣雜貨之外，仲有有當地藝術家嘅表演，包括音樂、吹氣球等，大家行市集之餘，可以欣賞埋表演。

井之頭恩賜公園Art Markets喺每個星期六、日都會舉辦，攤位貨品多元化而且價錢相當實惠，因為主辦單位提出嘅其中一個參展條件係「價格唔可以定得太高」，適合buget有限，但又想買創意手作嘅雜物控！

Photo from 井之頭恩賜公園官網

《井之頭恩賜公園Art Markets》
地址：東京都武蔵野市御殿山1丁目・吉祥寺南町1丁目・三鷹市井の頭3、4、5丁目・下連雀1丁目・牟礼4丁目
時間：每月星期六、日，詳情請參考官網
官方網站：http://inokashirapark100.com/park/
門票：免費

2. 位於神社內的市集：雑司ヶ谷手創市集

Photo from 雑司ヶ谷市集官網

雑司ヶ谷市集係喺「鬼子母神社」同「大鳥神社」入面舉辦嘅創意市集，距離熱鬧嘅池袋唔遠，不過位於住宅區之內所以比較寧靜。

市集分開兩個部分，由於「鬼子母神」係守護婦女同兒童嘅守護神，所以市集入面都有唔少童趣手作。雑司ヶ谷市集以創意手作物為主，攤位售賣嘅多數係攤主原創嘅手作，所以飾物、手袋、衫等等都非常獨特，唔怕同人撞。

市集位於神社入面，環境寧靜，適合同三五知己一齊行，行完仲可以入神社參拜一下。雑司ヶ谷手市集每個月第三個星期日舉辦，由於係露天市集嘅關係，所以落雨好有可能會取消，大家出發前記得留意官網消息。

Photo from 雑司ヶ谷市集官網

《雑司ヶ谷市集》
地址：東京都豊島區雑司が谷3-15-20 「鬼子母神社」及「大鳥神社」內
時間：每月第三個星期日，詳情以官網為準
官方網站：http://www.tezukuriichi.com/home.html
門票：免費

3. 古董二手市場：富岡八幡宮骨董市

Photo from 富岡八幡宮骨董市官網

「骨董」，即係古董，富岡八幡宮嘅攤檔以售賣有紀念價值嘅古董同日式傳統服飾為主，啱晒鍾意古著又或者對日本歷史文化感興趣嘅你！

除咗花樽、瓷器、佛像之外，亦有大量狂熱收集者佢地鍾愛嘅物品，喺其他地方絕對買唔到！而且喺富岡八幡宮擺攤嘅店舖嘅都有營運相關牌照，有啲老闆甚至識講英文，唔怕溝通有困難！

富岡八幡宮骨董市一個月有4個星期日會舉辦跳蚤市場，對比起其他市集，次數較為頻密，而富岡八幡宮更會舉行一個由參觀者向抬住神轎嘅轎夫撥水年度祭典—「深川八幡祭」，大家去參觀嘅時候不妨都去行下跳蚤市場。

Photo from 富岡八幡宮骨董市官網

《富岡八幡宮骨董市》
地址：東京都江東區富岡 1-20-3
時間：每月第1、2、4、5個星期日，詳情以官網為準
官方網站：http://www.kotto-rakuichi.com/index.html
門票：免費

4. 日本最大型的戶外骨董市集：大江戶骨董市

Photo from 大江戸骨董市官網

大江戶古董市集主要係由代代木公園同東京國際論壇大樓共同舉辦，集合咗大概250個攤位，喺呢度你可以挖掘到各種珍貴又有年代感嘅古董小物。除咗日本古董之外，仲有歐式設計風格嘅雜貨。

每次展出的主題都有唔同，以傳統傢私、復古小物同服飾為主，行完成個市集大約需要兩個鐘。會場設有餐車，行到攰可以買啲嘢食醫下肚。

大江戶骨董市集固定會喺每個月第1、3個星期日舉辦，時間大約從上晝9點至下晝4點。建議最好喺上晝去市集，除了因為中午過後人流會變多之外，商品數量有限，幾乎只有一個，對復古小物有興趣嘅你千祈唔好錯過！

Photo from 大江戸骨董市官網

《大江戶骨董市集》
地址：東京都千代田區丸の内3丁目5-1
時間：每月第1、3個星期日，落雨會取消，留意官網公佈
官方網站：https://www.antique-market.jp
門票：免費

5. 京都最多攤位市集：百萬遍知恩寺手作市集

Photo from 百萬遍知恩寺手作市集官網

百萬遍知恩寺手作市集係京都規模相對較大嘅市集，有成400個以上攤位，入面嘅手作種類繁多，有盆栽、飾物、咖啡、手工麵包等，行市集嘅人年齡層亦都非常廣泛。

手作市集喺知恩寺入面，所以可以入寺廟參觀，四周圍都有提供座位，非常貼心，行到攰可以坐低休息一下。

百萬遍知恩寺手作市集每個月15號都會舉辦，由於攤檔都開喺帳篷下面，除非發生颱風等惡劣天氣，如果唔係，就算落雨都會照常舉辦！絕對係雜貨控嘅天堂！

Photo from 百萬遍知恩寺手作市集官網

《百萬遍知恩寺手作市集》
地址：京都市左京区田中門前町103知恩寺內
時間：每月15號
官方網站：http://www.tedukuri-ichi.com/
門票：免費

咁多創意市集，梗有一個啱你行，下次plan行程可以加埋入去啊！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）

【想隨時隨地緊貼本地食買玩資訊？】

👉🏻 即刻Follow我地Instagram holidaysmart.hk

👉🏻 訂閱我地 Youtube Channel

文青必去日本5大市集推介 創意手作/古著舊物 雜貨控掘寶之地