《延禧攻略》觀眾必知5大細節位 神還原清朝風格!色調全部襯過晒~

《延禧攻略》觀眾必知5大細節位 神還原清朝風格!色調全部襯過晒~

時事熱話 生活熱話
By Jackie on 21 Aug 2018
Digital Editor

講起今個夏天最值得人留意嘅劇集,必定係最近熱播嘅清宮劇《延禧攻略》!當中除咗演員班底令人矚目外,大家又有無留意到其實《延禧攻略》入面嘅設計以至劇情,全部都有諗過度過,完美參考返清代嘅多個細節,剩係呢點都已經好值得睇啦!

微博@延禧攻略Photo from 微博@延禧攻略

《延禧攻略》以下多個細節位,必定會令你發現其後製班底絕對係做足Research,場景以至服裝造型都唔馬虎!大家睇嘅時候記得唔好只掛住留意劇情,畫面仲有好多細位,分分鐘令你越嚟越欣賞《延禧攻略》啊!

微博@延禧攻略Photo from 微博@延禧攻略

細節1:偏灰沉色畫面呈現 更顯宮廷高貴優雅感!
唔知大家有無發現,《延禧攻略》睇落去之所以同一般無綫劇感覺完全與別不同,其實係因為整個畫面色調,抹去咗以往宮廷劇鮮艷奪目嘅超掁眼「鮮色調」,用一種較為偏灰沉嘅畫面色調呈現,睇落去相當高貴舒服,唔似一般宮廷劇睇落咁鮮色傭俗。

微博@延禧攻略Photo from 微博@延禧攻略

以往宮廷嘅總予人一種「又係果啲一班女人爭權鬥艷嘅八婆戲」,其實唔多唔少係受過分鮮艷嘅顏色影響,睇畫面已經比人一種好嘈好煩嘅感覺。

微博@延禧攻略Photo from 微博@延禧攻略

而《延禧攻略》嘅偏灰沉色調就完全無呢種感覺,反而比人一種優雅、寧靜嘅宮廷感,比起劇集,更加似一套電影色tone!

微博@延禧攻略Photo from 微博@延禧攻略

細節2:「中國傳統國畫」色調運用 服裝配搭依足權力地位!
《延禧攻略》以偏灰沉嘅畫面色調為主,當然需要場景同服裝造型嘅配合啦!仲要唔係亂配搭,係絕對有襯過㗎!

微博@延禧攻略Photo from 微博@延禧攻略

有唔少人認為《延禧攻略》嘅服裝造型顏色係參考歐洲一種名為「莫蘭迪色」嘅高級灰冷色調,但其實一套中國宮廷劇,當然唔會係參考外國色調啦!

微博@徐峰立Photo from 微博@徐峰立

《延禧攻略》當中嘅服裝顏色運用其實係參考當時嘅中國傳統國畫色,同樣都係偏灰冷色調,但事實上比「莫蘭迪色」更為沉實,更顯宮廷高貴奢華感。

微博@徐峰立Photo from 微博@徐峰立

顏色都係中國傳統國畫常見顏色,如靛藍、粉肉、淡藍綠嘅「蟹青色」、橘紅嘅「瑪瑙色」等,而且用色統統有根有據!

微博@徐峰立Photo from 微博@徐峰立

例如在中國傳統中,「瑪瑙色」有種華麗、權貴、高傲感,所以瓔珞上位後隨即着上喱種顏色嘅服裝。

微博@延禧攻略Photo from 微博@延禧攻略

而靛藍色即代表掌握大權、有財、沉穩冷靜,非常適合由佘詩曼飾演嘅嫻妃!

微博@徐峰立Photo from 微博@徐峰立

同一般宮廷劇咩都大紫大紅相比,《延禧攻略》嘅服裝造型完全奢華高雅更多!

細節3:服飾打扮參考古禮 滿族女子還原度甚高!
1. 「一耳三鉗」
除咗衣着外,連服飾嘅細節打扮都超認真!當中最明顯嘅係演員上「每邊都戴有3隻耳環」,呢個打扮唔止係為美觀而設,係出自一個名叫「一耳三鉗」嘅滿族傳統!

廣告
廣告

微博@延禧攻略Photo from 微博@延禧攻略

滿族傳統上女仔出生後會穿上3個耳窿,並需戴上耳鉗。而以翠、玉、金、銀所造嘅耳鉗通常代表富貴人家,係清代時期嘅宮廷後妃必需足傳統戴上3隻耳鉗,所以大家喺《延禧攻略》中,都會見到宮廷內嘅妃嬪都有隻上3串華麗耳飾。

微博@延禧攻略Photo from 微博@延禧攻略

2. 「兩把頭」、「通草絨花」髮飾
唔止係「一耳三鉗」,頭髮造型都有還原到清代真實外貌!雖然有唔少網民曾嘲笑《延禧攻略》當中嘅髮型古怪,但對於當時嘅還原度超高!各妃嬪頭上嘅「兩把頭」其實係乾隆時期所流行嘅髮型,當中嘅髮飾都有參考到中國國畫記載嘅髮飾。

微博@延禧攻略Photo from 微博@延禧攻略

而秦嵐所飾演嘅富察容音皇后,由於根據歷史記載為一位溫柔賢淑嘅人,所以頭上都係用日常「通草絨花」嘅髮飾,「絨花」亦有「榮華」之意,非常適合人物性格,而唔係胡亂配上翡翠珠寶,相當有心思!

3. 「緯唇妝」
大家有無留意妃嬪們嘅妝容呢?其實又係一心思細節位!不難看出部分妃嬪們明顯嘅外淺內深唇妝,當然唔係參考曾經好興嘅咬唇妝啦,呢種名為「緯唇妝」其實係當時宮廷嘅流行打扮,可見劇組連妝容都研究得相當仔細!

YouTube@TVB (official)Photo from YouTube@TVB (official)

微博@延禧攻略Photo from 微博@延禧攻略

細節4:情節加入中國傳統工藝 睇得出劇組用心製作!
1. 刺繡
《延禧攻略》中宮女瓔珞精於刺繡,劇組為突顯中國刺繡工藝,特意邀請傳統匠人依照古法,親手製作戲服、道具,顯出中國「四大家織」之一「蘇州緙絲」嘅震撼,令服裝上嘅刺繡超搶眼奪目!劇組連其他飾品都係請來傳統匠人製作,質感相當細膩!

Facebook@愛奇藝台灣站Photo from Facebook@愛奇藝台灣站

微博@延禧攻略Photo from 微博@延禧攻略

2. 崑曲
《延禧攻略》當中仲加入中國非物質文化遺產「崑曲」表演,飾演高貴妃嘅譚卓仲特意跟老師學「崑曲」,完美呈現乾隆時期嘅傳統。

微博@延禧攻略Photo from 微博@延禧攻略

3. 打鐵花
除咗「崑曲」表演,劇情仲有同樣係中國非物質文化遺產嘅「打鐵花」!具千年歷史嘅「打鐵花」係明清時期嘅傳統慶祝活動,可見劇組對中國傳統嘅呈現都真係相當認真!

微博@延禧攻略Photo from 微博@延禧攻略

細節5:4年時間搭真實紫禁城 神還原乾隆風貌!
唔好以為《延禧攻略》係於北京紫禁城入面拍攝,其實劇組係用咗4年時間搭建近乎真實紫禁城嘅場景,重現紫禁城最迫真一面!

YouTube@TVB (official)Photo from YouTube@TVB (official)

而且當中嘅佈景都非常精緻,唔會係天花龍鳳,志在還原乾隆年間風貌,相當樸素典雅,場景設計仲會襯返人物角色性格,例如以大量紫檀木同布幔流蘇於富察皇后宮中,呈現富察皇后溫柔高貴嘅一面等,絕對值得觀眾留意!

Facebook@愛奇藝台灣站Photo from Facebook@愛奇藝台灣站

其實一套宮廷劇唔止可以睇劇情,入面所有打扮、畫面呈現都係劇組人員一番心思,而且今次《延禧攻略》製作超認真,全部打扮都跟足中國傳統參考,仲融合中國文化元素,絕對值得大家留意同欣賞,就連平時唔太中意睇宮廷劇嘅小編都好想快啲開電視睇啊!

圖片來源:微博@延禧攻略、YouTube@TVB (official)、微博@徐峰立、Facebook@愛奇藝台灣站

Text: Holiday Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel