阿嬌回顧人生想回到20年前重拾快樂童年佢依家最想做嘅係：做媽媽！

By Ivory on 22 Aug 2018

Digital Editor

鍾欣潼喺內地綜藝節目《舉杯呵呵喝》同主持人們邊食嘢，邊傾計，講咗好多有關佢人生嘅經歷同感受，難忘嘅經歷令在場嘅人都忍唔住淚水，淚灑鏡頭前。

有個主持人講番之前同阿嬌傾計嘅時候提到如果人生重頭嚟過，會選擇點樣嘅人生。阿嬌就話：「我唔想大起大落嘅人生，有得選擇，我想做周揚青（羅志祥女朋友），從小屋企嘅人就好呵護佢，唔想經歷太多，想平平穩穩、大方得體咁生活。」

Photo from 舉杯呵呵喝

又有主持人問阿嬌：「如果要你捨棄你依家嘅嘢，番返去10年前，你願唔願意？」阿嬌猶豫咗一陣就答：「唔願意。但如果番返去20年前，我願意！」佢大方承認佢唔係因為鍾意娛樂圈嘅生活而入行。佢做演員係為咗養家。佢仲話：「如果番返去20年前，我想要一個開心嘅童年。」

Photo from 舉杯呵呵喝

佢直認自己唔識做人，唔識表達自己，覺得自己性格唔適合娛樂圈。佢解釋話：「可能因為同成長經歷有關。我喺單親家庭／寄養家庭長大，由細到大，就係喺唔同嘅家庭比人養（比人當波咁踢）。由幼稚園至小學，轉咗7間學校。我冇朋友，更加唔想識朋友。因為知道自己好快就轉校，當我入到去，人哋已經開始咗，我無辦法進入佢哋（圈子），所以我唔識點樣同人傾計。」

Photo from 舉杯呵呵喝

主持人又問：「如果喺你（阿嬌）電話入面揀，邊張相係最唔捨得刪除？」阿嬌就話係同爺爺嘅合照！講起爺爺，阿嬌仲哽咽起嚟，「爺爺好錫我，所以我同爺爺嘅關係最好。以前因為同爺爺住得遠，所以少番去陪佢。有一次，爺爺自己去睇醫生，比車撞，但都唔敢同我講。我好後悔以前冇抽時間陪佢！」

Photo from 舉杯呵呵喝

喺節目入面，阿嬌講到，原來佢仲有嘅細佢16年嘅細妹，佢好想關心佢，想妹妹對佢敞開心扉，但可能年紀相差太多，妹妹對住佢會自卑，比較難溝通。

有個主持人問阿嬌：「你依家最想做乜嘢？」阿嬌諗都冇諗就答：「做媽媽！」可能礙於佢有個唔係幾開心嘅童年，佢唔想下一代經歷佢嘅遺憾，希望自己可以令自己嘅小朋友有個快樂嘅童年。

Photo from 舉杯呵呵喝

片尾有個caption, 真係好催淚「每個獨立的女孩，都是值得被疼愛。」係成段片入面，除咗佢講爺爺嘅時候哽咽之外，當其他主持人為佢抱不平嘅時候，表示佩服佢經歷咁多野，仲可以堅強企番起身，佢都好安然，平靜。我諗冇人會估到，原來阿嬌嘅身世係咁，真係令人好心痛佢。佢係值得我哋尊重同佩服。相信阿嬌嘅Fans都希望阿嬌都可以一直幸福落去。