走進全藍色天堂！推介摩洛哥小城舍夫沙萬夢幻景點+必住必買

北非國家摩洛哥出名靚景多多，但講到最受遊客歡迎嘅一定係西北部山城舍夫沙萬（Chefchaouen）！舍夫沙萬海拔高達564米，又名「藍色城市」，成個山城上嘅建築物都被油成藍色同白色，如同仙景一樣，非常壯觀！

Photo from shutterstock

「藍色城市」之所以一片蔚藍，有傳係因為呢度早期係猶太居民嘅避難所，佢哋將房子油成天空一樣嘅粉藍，象徵同神嘅距離依然貼近，亦又有指因為藍色係水、海洋嘅顏色，當地人認為指藍色有驅蚊作用。或者係因為咁，呢度嘅藍唔會令人有份憂鬱感，反而感覺寧靜和諧。

舍夫沙萬地方細細，景點唔多，花一日已經可以行晒。不過呢度大街小巷都咁靚，單係影相已經有排影！

Photo from shutterstock

西班牙清真寺(Mosquée Spanish Mosque)

清真寺位於山頂，可以從高俯瞰舍夫沙萬全貌，係賞夕陽同夜景必去好地方。

Photo from shutterstock

Photo from shutterstock

舊城區

同其他摩洛哥旅遊城市一樣， 舍夫沙萬都有保留原始風貌嘅舊城區，老城牆、全藍廣場處處，恍如進入另一個夢幻國度。

Photo from shutterstock

仲可以喺廣場茶座坐低嘆杯地道熱薄荷茶，感受北非風情。

Photo from shutterstock

必買獨特Jalaba

舍夫沙萬比起其他大城市物價較低，係Shopping掃貨好地方！當然要入手阿拉伯風工藝品、香料染料做手信！不過想買得精明，努力講價依然係必須嘅！

另外呢度嘅Jalaba（阿拉伯傳統長袍）比起其他地方嘅更有特色同時代感，頭頂係個尖尖帽子，著上身成個魔法師咁！而且因舍夫沙萬位於高地，氣溫較清涼，故會用羊毛製造Jalaba，靚料又夠暖呀！

Photo from shutterstock

風景靚、件衫又夠「夢幻感」，隨便搵個地方影相都超有型啦！

Photo from shutterstock

必住庭院大宅

喺舍夫沙萬過夜，除咗住一般賓館酒店外，仲可以試吓住呢種摩洛哥傳統民宅！大宅由中庭至房間設計都好別緻，猶如天方夜譚場景！

Photo from booking.com

伊斯蘭式圖案、雕花超華麗，配埋「舍夫沙萬式」嘅藍色真係一絕！

booking.com

Photo from booking.com

舍夫沙萬交通

要去舍夫沙萬都唔易㗎！舍夫沙萬位於高山上，交通唔太方便，只能搭巴士或跟團包車前往。

自由行遊客通常由首都卡薩布蘭卡（Casablanca）出發，需時約6小時15分鐘，或由另一熱門旅遊城市菲斯（Fes）出發，需時約4小時30分鐘。可到CTM巴士網頁了解班次詳情。

摩洛哥旅遊資訊
官方語言:阿拉伯語、法語
宗教:伊斯蘭教
最佳旅遊季節:3月-6月、9月-10月(春秋季)
簽證:香港特區護照持有人可獲免簽證30日
注意事項: 治安、衛生情況一般，宜多加留意。入鄉隨俗，尊重當地伊斯蘭風俗。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）