【山竹襲港後】交通癱瘓市民返工如打仗 林鄭呼籲：僱員可致電上司未能上班

超強颱風山竹逐漸遠離香港，不過市面情況仍未恢複正常。雖然澳門同內地政府宣佈全面停工停課，不過港府則無強制停工安排。

今朝大批打工仔返工有如「打仗」，港鐵、巴士站大排長龍迫到爆，提早出門都大失預算，唔少街道上仲有倒塌樹木同玻璃碎，可以話係「危機四伏」！

Photo from 香港突發事故報料區

Photo from 香港突發事故報料區

Photo from 香港突發事故報料區

特首林鄭月娥今早見傳媒，呼籲僱主抱體諒態度去處理員工返工安排，「唔好因為上班遲咗，就要扣人工，或要無勤工獎等懲罰」，如員工非提供緊急服務、處理颱風善後工作等，如遇公共交通問題，可致電上司通知未能上班。

Photo from TVB News

被問到點解唔直接停工，林鄭稱「由僱主僱員互諒互讓，體恤的方法做」更適合香港情況，「大家見到我哋有國際會議進行，亦有成員來參與會議。」

不過林鄭呢個呼籲會唔會太遲啦？唔少打工仔大呻已經一早趕返公司。唉！只希望收工時，市面能回復正常啦！

相片來源：香港突發事故報料區@FB

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）