「颱風之子」潘蔚林有接班人喇！張家灝直播險被吹跌 同當年「MJ潘」有得揮

尋日山竹襲港，唔少人除咗不時留住風暴消息之外，當年仲有喺打風日子一定會諗起無綫新聞主播潘蔚林，而呢日佢又要出動喇！

Photo from TVB

09年時潘蔚林喺尖沙咀碼頭直擊時，因為風太大而表演咗一幕Michael Jackson嘅45度傾斜絕技，成為經典，仲因為咁有「MJ潘」呢個名添！

Photo from TVB

而事隔9年「MJ潘」又再重返尖沙咀，朝早喺9號風球下喺尖沙咀海傍直播，而傍晚改掛8號風球時佢依然留守。雖然今次佢就冇當年咁狼狽，但依然受盡風吹雨打，成面濕晒呀！

有網民就搞笑指佢係「颱風之子」、「颱風御用記者」！

Photo from TVB

不過真係沒有最慘只有更慘，講緊嘅係喺杏花邨做直播嘅張家灝呀！睇嚟潘蔚林有接班人喇！

Photo from TVB

張家灝一邊喺杏花村海旁報導現場情況，一邊受盡狂風暴雨吹襲，同當年潘蔚林嘅情況不相伯仲，真係隔住個Mon都戥佢陰功！點知高處未算高，一個大浪冚埋嚟，睇落有番咁上下份量嘅張家灝都吹到成個人郁咗差啲跌低！

Photo from TVB

真係睇見都覺得牙煙呀，不過佢依然頂硬上完成報道，網民都忍唔住激讚佢好敬業樂業，向一班打風都堅守工作崗位嘅人致敬呀！

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）