倫敦馬拉松派爆水珠珠！膠樽需450年分解 食用水球成粒吞超環保！

最近香港開始提倡「走塑」，多間食肆唔再主動派飲管，有小部分餐飲店更鼓勵大家自備餐具、水樽等，為環保出一分力。而倫敦馬拉松比賽嘅主辦單位仲搶先出新招，以食用水球代替膠樽，真係好值得學習同欣賞啊！

Photo from Shutterstock

一個膠樽看似平平無奇，但其實需要450年時間先可以分解㗎，加上都市人一日棄置成千上萬膠樽，對地球負荷好大！特別係各大型運動比賽，每個選手一人拎一枝，難免造成浪費。

Photo from Shutterstock

有見及此，倫敦於9月以「全面限用塑膠品」為主嘅半程馬拉松比賽中，大會以「食用水球」代替膠樽，特別之處係呢個食用水球可以成粒吞，絕對係零浪費！

Photo from FB@Ooho

呢個好似爆水珠咁嘅食用水球名為「Ooho」，係由倫敦專門研發環保包裝物料公司Skipping Rocks Labs所推出嘅。食用水球以海藻萃取物作容器，飲水時可以一次過吞落水，呢個飲水方法其實環保得嚟仲幾過癮！

Photo from FB@Ooho

除咗可以減少使用膠樽外，喱種食用水球所用嘅海藻，食用安全性非常高，而且海藻繁殖迅速，可以唔會本末倒置影響生態平衡㗎！

Photo from FB@Ooho

其實食用水球「Ooho」唔係最近先研發嘅，但一直鮮有機會被廣泛使用。除咗水球外，倫敦Richmond馬拉松比賽中，大會仲會喺3個水站中提供9萬個可100%完全被生物分解嘅杯，同樣係超環保啊！

Photo from FB@Ooho

呢啲咁環保又方便嘅飲水方法，唔知香港嘅馬拉松比賽日後又會唔會考慮試下用，為地球出一分力呢？

圖片來源：FB@Ooho、Shutterstock

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）