《衝上雲霄2020》衝返內地拍？傳多位內地演員擔正 原班底或瓦解！

之前一直深受男女老幼歡迎嘅TVB劇集《衝上雲霄》，有傳將會開拍第3部曲《衝上雲霄2020》！相信一眾劇迷都已經等到頸都長，想快啲再目睹Cool魔、Sam哥嘅風采啦！不過咪住先，《衝上雲霄2020》有傳會返內地拍，除咗會加入多位內地演員外，仲有傳原班人馬未必會參演啊！唔知呢個大變動傳聞，會唔會令大家無曬興趣呢？

Photo from FB@TVB

早前TVB宣布將會聯同騰訊影業，以及中國廣播影視出版社，並耗資2億元人民幣合拍《衝上雲霄2020》。而近日無綫（節目及製作）副總經理杜之克更提到，《衝上雲霄2020》將會以內地為故事背景，但故事仍會以追夢、航空為主。聽落故事發展應該同上兩部相近，但故事背景、角色班底會出現大變動。

Photo from FB@TVB

《衝上雲霄》可算是近年嘅TVB「神劇」之一，當中嘅角色、演員都曾成為一時熱話。而今次《衝上雲霄2020》決定與內地合拍，選角同原班底當然成為一眾衝上雲霄迷嘅討論熱話啦！

Photo from FB@TVB

如果鍾意睇《衝上雲霄》係因為Cool魔、Sam哥、Zoe等角色，新一部《衝上雲霄2020》可能要令大家失望啦！事關飾演Cool魔嘅Chilam張智霖，於2013年9月宣布加盟蕭定一旗下嘅中國3D數碼娛樂有限公司，而蕭定一同TVB嘅糾紛至今仍未解決，睇怕都好難喺《衝上雲霄2020》見返Cool魔啦！

Photo from IG@chueng_chi_lam

而喺《衝上雲霄》中擔任Summer一角嘅胡杏兒，近日仲同老闆蕭定一發聯合聲明，宣布雙方已約滿，結束賓主關係。而且仲有傳打算自組工作室，所以會出演《衝上雲霄2020》嘅機會更加係微乎其微啊！而飾演Sam哥細佬嘅吳卓羲都已經唔再係TVB旗下藝人，相信都好難再出演《衝上雲霄》。

Photo from IG@myoliemyolie

Photo from IG@myoliemyolie

而飾演Sam哥嘅吳鎮宇則聽聞會參演新劇《衝上雲霄2020》，不過原班底得返Sam哥一個，如果大家係因為角色、演員而鍾意睇《衝上雲霄》嘅話，新劇可能會令大家有感無嘢好睇啦。

Photo from FB@FrancisNg.Page

《衝上雲霄2020》話明係合拍劇，而且仲傳咁多原班人馬唔會參演新劇，當然會加入內地演員啦！有傳TVB以及騰訊力捧迪麗熱巴、楊冪、Angelababy以及前韓國男團EXO成員黄子韜演出，如果確定係以上人選，唔知大家仲會唔會期待《衝上雲霄2020》呢？

Photo from 微博@Dear-迪麗熱巴

Photo from 微博@Angelababy

Photo from 微博@楊冪

Photo from 微博@CPOPKing-黄子韜

新劇除咗於演員上有大變動之外，有部分人鍾意睇《衝上雲霄》更加係因為多個外景拍攝，包括日本、意大利、澳洲等地，令一眾劇迷覺得有誠意、畫面靚又有新鮮感，今次主要集中喺內地拍，唔知《衝上雲霄2020》又能唔能夠承接前兩部嘅熱潮，再次帶觀眾日唱夜唱「噢～天氣不似預期」呢？

Photo from FB@TVB

圖片來源：FB@TVB、IG@chueng_chi_lam、IG@myoliemyolie、FB@FrancisNg.Page、微博@Dear-迪麗熱巴、微博@Angelababy、微博@楊冪、微博@CPOPKing-黄子韜

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）