【跳躍生命線】網友大讚新一集結尾收得靚 全因多咗鄭子誠把靚聲旁白 嚴厲教官秒速變回音樂情人

大台新劇《跳躍生命線》琴晚（15日）播出第6集，同上一集一樣，劇集結尾部分由演員獨白收尾，不過今集唔係馬德鐘，而係音樂情人鄭子誠。網民大讚佢把聲好靚，ending收得好好！

其實鄭子誠飾演嘅教官角色已經喺第4集出現，未出場之前，都有唔少網友表示好期待鄭子誠用佢把靚聲鬧爆何廣沛佢哋班新仔（學員）。

果然不負眾望，教官鄭子誠一出場，聲都未出就有股威嚴鎮住你先。鄭子誠飾演一個非常嚴厲嘅教官，尤其對於何廣沛呢啲比較有個人意見嘅新仔，更為嚴謹。無論係個人守紀，定係團結就是力量，都喺訓練內容當中。鄭子誠嘅處處刁難，令佢同何廣沛之間產生好大化學作用，何廣沛嘅倔強加上鄭子誠嘅嚴謹，教人睇得更投入。

而琴晚（15日）嗰集就講到班學員喺休息期間，突然發現何廣沛同阿爸住緊嘅嗰棟樓發生火警，何廣沛即刻衝去問準教官鄭子誠，可否外出睇吓阿爸有無事。而鄭子誠就話：「原則上無問題嘅，不過程序上我要通知總教官，我轉頭再覆你。」何廣沛就話依家十萬火急，鄭子誠即刻話：「你記住，要等到我批准先可以離開，否則我當你擅自離開，你明白有咩後果㗎啦」

何廣沛無理，即刻去換衫離開，喺行去出口嘅途中，其他學員拉住佢，叫佢諗清楚，因為一去就返唔到轉頭。喺無人勸得掂佢之際，鄭子誠大嗌：「要走由得佢走！未經上司批准，只要你踏出呢個門口，我就當你擅自離開，違反學院守則，跟規矩革除你，file花咗，你唔洗旨意考返入消防處，甚至乎其他紀律部隊！」

爭執一輪後，何廣沛堅決離開，只差一步就踏出門口，呢個時候電話響起，何廣沛阿爸打電話報平安，知道阿爸無事，即刻安心晒，但同時見到自己半隻腳已經踏出咗門口。其他學員紛紛上前維護，甚至幫佢作藉口，向教官求情。而呢幕就見到鄭子誠身體樣子都保持教官威嚴，但係眼神裡面藏不住嘅係滿滿嘅感動。見到呢班「仔」終於團結起來！

其實鄭子誠演繹教官呢個角色雖然嚴謹，但其實喺細節位感受到佢惡其實出自愛，佢希望呢班學員好，佢喺何廣沛想離開嘅時候，由批准到警戒到責罵到相勸，其實都只係希望佢明白做救護員嘅責任係乜嘢，唔希望佢一失足成千古恨。鄭：「邊個無屋企人？但只要著住呢套制服，就有職責在身，就算屋企人出事，都要緊守崗位，唔可以離棄傷者...你更加要相信其他同事，會同你一樣盡最大努力救你屋企人脫離危險。」

點解會話收得靚呢，就係因為劇集結尾部分，以鄭子誠嘅旁白做收尾，無咗嚴厲苛刻嘅聲音，換上一把溫柔渾厚嘅聲線，讀出一段令人深思嘅旁白，讓人沉醉當中，結尾也變得美滿。

結尾講述鄭子誠收工離開消防及救護學院時，凝望事發當時嘅出口，一臉感概，此時旁白出現：「有月亮嘅夜晚，星星就會黯淡，要等到雲霧收起月色，星星先可以發光發亮，一切都係相對嘅，人總係會有一刻，你一位失去所有嘅同時，竟然會係前所未有嘅得著，乜嘢係可以捨棄，乜嘢係不能放手？迷惘過後，緊隨嘅會係一顆澄明嘅心，傷痛過後，換來嘅會係更堅定嘅人生，當你以為會失去一個人，到頭來竟然會得著一整隊人，望住佢哋心意一致，目光堅定不移，今晚月色好靚，但係就無辦法掩蓋地上星光燦爛。」

大家想像到一個平時放大喉嚨鬧人嘅教官，一秒變回擁有渾厚磁性聲線嘅音樂情人鄭子誠嗎？網友紛紛表示好有feel好正！

有無人都聽到起晒雞皮啊？

真係無人可以取替佢把咁渾厚嘅靚聲！

仲有網友話好似聽緊收音機咁喎～

相片來源：香港討論區、mytv截圖

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）