加拿大古堡行禮秘密註冊 苟芸慧親認9月已成為人妻！

藝人苟芸慧（Christine）同陸漢洋（William）周五（19日）就喺上水雙魚河鄉村會所舉行婚禮，原本以為佢哋會喺當日註冊，不過今日就有消息指佢哋其實喺九月時就已經喺苟芸慧嘅娘家加拿大多倫多註冊結婚喇！

Photo from 苟芸慧 instagram

二人由拍拖到結婚，都sweet到爆，陸漢洋喺每一個重要時刻都會花盡心思去氹Christine開心。

5月時佢哋更去加拿大、法國、韓國等唔同地方影婚紗相，而每個地方都係好有特別意思㗎，如：加拿大係苟芸慧嘅成長地，法國係Christine第一次睇賽車大賽嘅地方，至於韓國，就因為苟芸慧有四分之一嘅韓國血統，老公咁錫自己，難怪Christine笑都笑得甜過人喇！

對於兩人已註冊一事，William就直認二人經已註冊。佢仲喺9月18日為咗圓Christine想喺古堡行禮嘅夢，喺多倫多安排咗一個神秘婚禮，邀請女方喺多倫多嘅家人和舊同學參加，場面既溫馨又驚喜！

William指佢先搵Christine嘅爸爸、弟弟和加拿大認識超過二十年嘅舊同學幫手安排，而加拿大契家姐就由佢落機開始陪住他去製造呢個驚喜之旅。

談到婚禮過程，Christine就指：「呢個係一個好溫馨嘅婚禮，其實我覺得佢之前已經古靈精怪，不過佢一向都係咁，所以冇理。婚禮舉行嘅朝早，原來佢將婚紗帶到嚟多倫多，我哋去咗影相，我仲以為只係去影結婚相，心諗呢個應該係佢畀我嘅驚喜，之後我哋去到婚禮現場，先知道原來真係一個婚禮。當見到一啲接近十年冇見過嘅長輩、朋友專誠嚟出席，真係好開心，睇得出William真係花咗好多心機去籌備呢個婚禮。」

不過驚喜又點止咁少呀，William仲為佢做咗好多不可能任務添，如：為Christine學跳社交舞、用盡方法搵Christine嘅中小學同學等，就係希望令婚禮盡善盡美。

真係聽到都覺得冧爆呀！祝佢哋兩個百年好合、早生貴子！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）