「垃圾徵費」最快2020年實施！按袋+重量收費 違者罰款$1500

政府提出「都市固體廢物收費」多年，落實期近日有新方向。政府新聞局公佈，將於下月14日向立法會提交《2018年廢物處置（都市固體廢物收費）（修訂）條例草案》，希望出年審議及通過，「垃圾徵費」預計最快2020年底落實。

政府建議喺新例下，收費模式分為「按袋」同「按重」兩種收費。

「按袋」收費下，市民需要於超級市場、便利店、郵局、自動售賣機等4000多個獲授權銷售點，購買「指定垃圾袋」棄置垃圾。

Photo from 環境保護處

「指定垃圾袋」分為九種，容量由3公升至100公升，每公升收費0.11元。常用嘅10公升裝，每個賣1.1元，15公升裝賣1.7元。政府估計3人家庭一日用一個，每月垃圾費33至51元左右。

Photo from 環境保護處

而無法放入指定垃圾袋嘅大型垃圾，例如工商業處所棄置嘅龐大或不規則形狀廢物，需貼上大型廢物標籤，每個標籤劃一收費11元，再送到食物環境衞生署垃圾收集站，並按重量收取「入閘費」。而「指定垃圾袋」同「大型廢物標籤」都會有防偽特徵。

前線人員會喺即垃圾車及垃圾站，拒收唔符合要求嘅廢物。執法方面，環境局建議草案通過後及正式實施收費前，設為期12至18個月準備期，並喺落實後設半年適應期，期間執法人員會以口頭勸喻違規個案。適應期過後，局方會針對「黑點」嚴厲執法。違規處理廢物者會被發出罰款通知書，每張為定額1500元，嚴重違規人士或以傳票罰款及檢控。

Photo from 環境保護處

Photo from Radio NZ

局方又計劃應用創科措施幫助執法，包括開發手機Apps供公眾舉報違規個案、喺指定地區安裝有智能科技嘅監察攝影機，同擴展安裝網絡攝影機，預料明年將逐步投入運作。

另外所有綜援人士及高額長者生活津貼受助人，每人每月可獲政府提供$10津貼，以支援「垃圾徵費」下嘅額外開支。

資料來源：政府新聞處、都市固體廢物收費專題網站

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）