又到聖誕！精選10份好玩又實用的百元禮物 交換禮物必備！

每年聖誕最令人頭痛嘅就係交換禮物，究竟買咩禮物好呢？今次小編就精選咗10份玩得又用得嘅禮物，份份都係＄100左右，啱晒買嚟交換禮物啦～

1. 環保杯套／環保飲管 (參考價錢：$66.9-78)
小編同大家一樣，身體有70％都係珍珠奶茶，每日起碼飲一杯珍珠奶茶，製造咗唔少垃圾。要響應環保，除咗可以自備水杯之外，仲可以用埋環保杯套同埋環保飲管，咁就用少好多塑膠啦～買嚟送俾日日都飲珍珠奶茶嘅朋友就最適合不過啦～

Photo from Pinkoi
Photo from Pinkoi
參考連結 ／ 參考連結

2. 三十日健康挑戰便條 (參考價錢：$84.6)
呢個三十日挑戰便條係由西班牙設計師設計，一盒有三十張便條，張張設計都好靚。每張便條都寫住一項挑戰，每日做一項挑戰，係三十日之後，你就會達到目標，係一份好有意義嘅禮物。除咗「健康」，仲有好多主題，例如「快樂」、「慢活」、「出Pool」、「主廚」、「IG打卡」等等。

Photo from Pinkoi
Photo from Pinkoi
參考連結

3. 巨型Enter鍵 (參考價錢：$128)
呢份啱晒公司聖誕Party嘅交換禮物啦。呢個巨型嘅Enter鍵足足係普通Enter鍵嘅1700倍呀！佢嘅質料係海綿，可以俾你返工偷懶嘅時候當枕頭用添！最重要係，佢真係可以當Enter鍵用，只要插咗USB就用到啦～好實用呀！

Photo from Instagram
參考連結

4. 佛系冷帽 (參考價錢：$38.5)
佛系Party又點少得呢頂佛系冷帽，造型佛系而且保暖功能卓越，連耳仔都保暖到，相信收到呢份禮物嘅施主一定好開心！

Photo from Taobao
參考連結

5. Sad Frog 眼罩 (參考價錢：$68)
Sad Frog stickers 大家就用得多，眼罩又見過未呢？Sad Frog 厭世嘅雙眼好傳神！最特別係對眼可以合埋或者打開，最啱送俾啲固執朋友，暗示佢：做人都係隻眼開、隻眼閉啦！

Photo from Instagram
參考連結

6. 純白地獄拼圖 (參考價錢：$76)
聖誕Party諗唔到有咩好做？可以一齊砌砌圖！呢個純白地獄拼圖冇返三五七個鐘都砌唔晒呀，最啱打發時間！不過小心，呢個砌圖可能會令大家砌到好忟憎～

Photo from Elzzzup
參考連結

7. 柴犬毛氈 (參考價錢：$120)
喺聖誕節呢個咁溫暖嘅節日，緊係要送份溫暖嘅禮物俾人啦～呢張柴犬毛氈摺起係隻好可愛嘅柴犬，打開就係冬天必備嘅毛氈。仲有3隻色揀分別係黑色、啡色同埋白色！隻隻都咁可愛，收到邊隻都一定會覺得好溫暖！

Photo from Instagram
參考連結

8. 奸夫 Craftholic 公仔 (參考價錢：$89-139)
每逢節日，Craftholic都會推出啲節日主題嘅公仔。上年聖誕就出咗 "Chorus" 系列，白雪雪嘅奸夫好可愛！唔想送公仔？仲有好多週邊商品，例如毛毛拖鞋、攬枕等等～唔知今年聖誕出嘅奸夫會係點呢？

Photo from Craftholic
Photo from Craftholic

9. 無線充電 (參考價錢：$109)
呢個唔洗多講啦，叉電唔洗特登搵條叉電線，好方便！而且 iOS同 Android 都支援～不過就要留意返，唔係部部電話都有無線叉電呢個功能夠，大家送禮前就可以留意吓朋友用緊咩電話，先再準備禮物啦～

Photo from HKTVmall
參考連結

10. Gameboy手機殼 (參考價錢：$89)
呢個手機殼係真係玩到㗎～入面有幾十款經典遊戲，包括俄羅斯方塊、坦克大戰、賽車遊戲、射擊遊戲、青蛙過河等等！小編相信有咗呢個手機殼，無論係搭車、等人定排隊都會忍唔住係咁玩呢個「遊戲機」。

Photo from Yoho Hong Kong
參考連結

以上咁多款禮物無論係買嚟送禮定自用都好適合～朋友收到一定會好滿意～

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）