洪卓立落淚維護湯怡指二人因了解而分開：我仍然相信愛情

相戀11年嘅洪卓立同湯怡日前喺ig宣布分手，令一眾網民大感震驚，而洪卓立今日出席活動時就公開回應呢件事。

喺訪問環節，洪卓立主動提起此事：「不如我講先啦。」

佢話呢件事公開之後，影響咗大眾對Kathy（湯怡）嘅睇法，所以想同大家解釋清楚：「有啲嘢我想面對面同大家講。經過呢幾日公佈之後，大家都有唔同反應，影響咗大家對Kathy嘅觀感。有啲人就話我哋距離越來越大、話佢貪慕虛榮、紅少少就飛咗我。」

講到呢度，洪卓立已開始哽咽，忍唔住落淚，工作人員就遞上紙巾。洪卓立非常維護湯怡，指二人之間出現第三者呢件事係唔存在嘅，佢哋係因了解而分開：「完全唔存在嘅，我哋11年前一齊嗰陣，我第一隻碟都未出，仲未有《彌敦道》，中間我亦都有大病，如果佢係咁嘅人，有好多機會同我分開，遇到咁多難過嘅事情，佢可以好輕易咁走。」

佢之後繼續澄清二人亦都唔係因為「逼婚」而分開，佢指大家有共識35歲之後先至踏入另一階段：「所以並唔係大家所講，我唔肯娶佢，佢唔肯嫁我，唔肯結婚所以分開。我諗係大家對愛情嘅睇法唔同。」

洪卓立話見到湯怡俾人咁講有唔開心：「作為朋友，見到身邊人俾人咁樣講又好，一定會唔開心。」

至於對於網民話唔再相信愛情，洪卓立就話：「見到有啲留言話，見到我哋咁樣，就覺得呢個世界再無童話。我覺得每個人對愛情睇法都唔同，每個人都係獨特嘅⋯⋯我仍然係相信愛情。」

雖然洪卓立同湯怡已經分手，但見到立立咁維護湯怡，相信佢地的確係「會為對方赴湯蹈火的知心好友」。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）