夜遊北海道！極夢幻冰雪國度！酷似螢火蟲森林電影場景～超長冰滑梯任你瀡～

Hotel酒店推薦

By 123testing on 15 Jan 2019

冬天去日本玩，除左滑雪溜冰，夜晚嘅景色都份外迷人嫁！等小編介紹大家去呢個雪之國度遊玩一下、打下卡啦！

襯住冬天，梗係要把握機會去冰天雪地玩返夠本啦！
呢個冰村喺零下30度嘅Tomamu先會出現，去到今年（2019年）嘅3月中都仲有得玩嫁！
（根據氣象條件，舉辦期間可能會出現變動）

Photo from Ice Village官網

冰村嘅打卡位好豐富，而且入夜之後配埋燈飾好浪漫、好迷人～
一入門口就已經見到冰磚砌成嘅堡壘城牆，之後就走入迷人嘅「螢火蟲森林」喇！
呢度嘅波波燈飾一直沿住步道延伸，配埋優美嘅音樂一閃一閃，好靚呀～

Photo from PressLogic

入到村，第一件事就係要瀡冰滑梯喇！
瀡滑梯充滿左好多人嘅童年回憶，呢條滑梯就好似展開童心之旅嘅通道咁，滑完就去左同頭先唔一樣嘅世界！
（開放期間：即日起至 2019年 3月 14日；5pm-10pm）

Photo from Ice Village官網

呢度就好似冰磚砌成嘅小型國度，自成一家嘅冰村咁！
講起冰，當然唔少得溜冰啦！呢個溜冰場由下晝 5點開放到夜晚 9點45分，俾大家一邊溜冰，一邊欣賞森林同星空嘅靚景～
溜冰鞋出租服務，成人1000円（約$73）；小童需500円（約$37）。
（開放期間：即日起至 2019年 3月 14日）

Photo from Ice Village官網

溜完冰，不如就去食下野、醫下肚啦！
「冰書cafe」嘅枱枱櫈櫈都係由冰磚砌成，杯杯碗碗都係晶瑩剔透嘅冰，全部都好打卡able！
鍾意刺激嘅你，梗係要把握機會喺零下 30度嘅地方食刨冰（2500円，約$182）啦！
想人食返啲暖笠笠嘅野嘅話，就一定要試下芝士蔬菜火鍋（5000円，約$363）喇，好滋味！
（開放期間：即日起至 2019年 3月 14日；5pm-10pm，最終點單時間9：30pm）

Photo from Ice Village官網

仲唔夠暖嘅話成左年嘅大家可以去埋「冰之酒吧」飲返杯！
呢度提供50種以上的雞尾酒，裝喺雪山水造成嘅冰杯入面，靚丁唔捨得飲呀！
飲品費用由1000円（（約$73）起，咁多款酒都任君選擇！
（開放期間：即日起至 2019年 3月 14日；5pm-10pm，最終點單時間9：45pm）

Photo from Ice Village官網

其實呢度仲有個神秘夢幻打卡點嫁！純白教堂大家可能都見過，但係用冰砌成嘅透明教堂，大家又見過未呢？
「冰之教堂」係由一整塊冰無接縫咁建造而成嘅教堂，象徵住「兩個人純粹嘅感情連綿長久而唔間斷」，情侶喺度打卡、行婚禮，互訂盟誓夠哂浪漫！
祭壇、十字架、走道，連櫈都係由冰雪製成，好夢幻呀！
（開放期間：即日起至 2019年 2月 15日；參觀時間：5：45pm、7：45pm、9：45pm 每節約10分鐘）

Photo from Ice Village官網

除左cafe係呢一季嘅新節目，呢個冰之國嘅另一個新節目都好吸引！
就係「冰之旅館」喇！呢度嘅天花板同牆都係由冰製成，只提供一晚住宿，每人23000円（約$1670）一人，當中包括冰之露天浴池、冰之房間、早餐、睡袋同埋睡衣；但參觀就費用全免。接受網絡預約。
（開放期間：2019年 1月 19日起至 2月 28日；參觀時間：5pm-9：30pm；住宿體驗：10pm-翌日8am）

Photo from Ice Village官網

想體驗下住喺冰雪之國嘅感覺？咁就嚟玩下啦！
想知多啲，上佢地嘅官網睇下啦！

Photo from Ice Village官網

《Ice Village》
地址：北海道勇払郡占冠村中Tomamu星野Tomamu度假村內
入場費用：酒店客人（免費）；外遊客人（500円，約$37）
開放期間：即日起至 2019年 3月 14日；5pm-10pm
交通：免費酒店區內巴士，由RISONARE Tomamu出發，約10分鐘；由Tomamu The Tower出發，約3分鐘。