download HolidaySmart 假期日常 app
遊日賞櫻注意 日本櫻花秋天已開!逾350宗開花報告 或影響明年賞櫻?

遊日賞櫻注意 日本櫻花秋天已開!逾350宗開花報告 或影響明年賞櫻?

旅遊攻略 旅遊新聞
By Jackie on 19 Oct 2018
Digital Editor

最近應該有唔少想喺明年去日本賞櫻嘅朋友,頻頻上網睇平機票啦!不過想出年賞櫻嘅朋友注意啦,今年因天氣反常關係,日本最近竟有逾350宗櫻花開花報告,希望唔好再持續開花,而影響出年賞櫻情況啦!

WeathernewsPhoto from Weathernews

根據民間氣象公司Weathernews所示,有市民發現從10月9日起已開始有櫻花提早於今個秋季盛開,Weathernews為此於10月12-14日進行調查,發現截至10月14日,九州至北海道一帶共39個都道府縣,共接獲354宗開花報告,情況非常奇怪!

WeathernewsPhoto from Weathernews

報告中開花地區主要為關東南部、東海地區以及近畿地區,反映出唔止係沿海地區有提早開花嘅現象,連內陸地區都出現同樣情況!

究竟點解櫻花會提早喺秋季開花呢?日本花之會嘅樹木醫生和田博幸表示,櫻花之所以提早開,原因係受到日本第24號颱風「潭美」以及「鹽害」影響。

WeathernewsPhoto from Weathernews

和田博幸指,櫻花通常於7-8月出芽,花蕾可能會開花,但因樹葉會分泌出一種抑制植物生長嘅激素「脫落酸」,即使夏季天氣較高,櫻花亦不會開花。但由於颱風影響,強風以及鹽害造成大量落葉,無法再靠大量樹葉分泌「脫落酸」以抑制植物開長,因此溫度一旦達至20度以上,便會促成櫻花提早開花。

WeathernewsPhoto from Weathernews

相信已準備喺明年賞櫻季去日本嘅朋友,一定非常擔心開花情況!和田博幸估計,由於部分櫻花已開,已開花嘅花苞於明年春天唔會再開花,所以明年春天開花數量會減少。但目前秋櫻嘅數量仍然較少,因此未至於對明年春天有太大影響,所以去賞櫻嘅朋友都唔需要過分擔心啦!

ShutterstockPhoto from Shutterstock

反而更令人擔心嘅並非秋櫻,而係由於颱風導致多棵櫻花樹折斷或倒塌,如無適當嘅修剪,無倒塌嘅櫻花樹亦可能會於斷枝嘅地方開始腐爛,日後即使係櫻花季,開花情況應該已大不如前。

資料及圖片來源:Weathernews、Shutterstock

Text: Holiday Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel