生離死別皆有時解決到兄弟不和卻無緣做一輩子嘅兄弟

By Ivory on 05 Nov 2018

Digital Editor

張彥博喺《跳躍生命線》飾演嘅「雄姐」喺上星期五嗰集不幸離世。網民們都大叫不捨，仲有人話睇到呢一幕忍唔住流眼淚！

Photo from IG@bobcyp1005

話說前一集「六號」無啦啦遞信辭職，但竟然冇第一時間同好兄弟「雄姐」同「傑仔」講！傑仔透過細佬先知道呢件事，然後同一晚佢就同「六號」促膝把酒，順便問佢點解要辭職！點知「六號」揜住良心咁話：「我根本唔鍾意做醫生！唔好講到做救護員咁偉大！一日最多上門量吓血壓，度吓心跳！我唔屬於救護員呢個世界！」

Photo from 《跳躍生命線》

雄姐知道傑仔同六號鬧交之後，就不斷努力充當「和事佬」。趁休息室冇人，就同六號講：「我哋講到明三兄弟要齊上齊落咖嘛！仲有啊，我啱啱先考到救護車車牌，都未同你一齊出更！」

Photo from 《跳躍生命線》

之後又扮晒有感情問題，「呃」咗佢兩個出嚟，三兄弟「一酒抿恩仇」。「雄姐」仲「好特登咁借啲意」玩true or dare，希望「六號」講出辭職嘅理由。

Photo from 《跳躍生命線》

聰明嘅六號又點會估唔到佢哋嘅用意，遊戲未開始就自爆：「我大學係讀醫嘅，但去到Year3 壓力真係好大，所以我冇再讀落去。我成家都係做醫生，得我做唔到，我覺得好失敗，所以就收埋自己喺屋企，變到好自閉！」

Photo from 《跳躍生命線》

「我爸睇唔過眼，想我繼續讀書。但我嫌佢煩，仲自己搬咗出去住。扮咗出去冇幾耐，佢就唔喺度！」「佢走得好突然。過咗一排，我先知佢留底咗份遺產。但係要攞呢份遺產有一個條件：就係要做一年救護員！」

Photo from 《跳躍生命線》

傑仔聽到六號做救護員係為咗錢之後，就發脾氣走咗！雄姐同傑仔離開之後，六號聽番佢爸爸生前Send畀佢嘅錄音，完美表達「樹欲靜而風不息，子欲養而親不再！」，趕唔切孝順、趕唔切講再見嘅遺憾，實在令人催淚！

Photo from 《跳躍生命線》

之後，雄姐不斷搵方法做「和事佬」，用咗「最小學雞」，又好work嘅方法，解決兄弟不和。雄姐同六號講：「你唔係嬲啊？啊傑小氣啫，你唔係同佢一樣啊？」調轉頭，佢又同傑仔講：「你唔係嬲啊？六號小氣啫，你唔係同佢一般見識啊？」就好似現實中，總有個朋友充當和事佬，令你同朋友們雖然會鬧交，但最後都可以和好如初，做一輩子嘅朋友！