盧苑茵、歐瑞偉、鄭子誠勇奪專業演員大獎 歐瑞偉：我要多謝我嘅Terry！

琴日萬千星輝頒獎典禮完滿結束！有啲獎項實至名歸，有啲有人就覺得爆冷～而專業演員大獎，相信大家都唔會否定佢哋嘅演技，得獎者分別係：盧苑茵、鄭子誠同歐瑞偉！

盧苑茵由20歲出頭，就開始飾演媽媽嘅角色，但佢從未擔心被定型，憑專業、好戲，演繹一個個經典角色！

Photo from TVB 截圖

今次仲憑《BB來了》奶奶一角，令佢盡情發揮！劇中飾演佢仔仔嘅黎諾懿親手頒獎畀佢，真係好似見到自己親人攞獎一樣，Madam Lo仲喜極而泣添～場面溫馨又動人啊！

Photo from TVB 截圖

之後就輪到「完美奸人」鄭子誠！佢喺處男劇《真情》飾演過一次奸人之後，佢就開始咗佢嘅「奸人」生涯，最經典嘅梗係有封神榜嘅「暴君」啦！奸人角色演得維肖維妙，每部劇一有佢份，觀眾一定會諗佢會慢慢變奸定立刻變奸！但今次喺跳躍生命線飾演嘅嚴厲教官，一樣做得非常好，廣受大眾支持同歡迎！

Photo from TVB 截圖

佢攞獎嘅時候，謙卑咁話：「專業演員我唔敢當，我只係秉持住做演員最基本嘅態度同本分去做我每一個嘅角色。另外，我一直相信你喺咩環境、工作中長大，你就會成為嗰類嘅人。我拎到呢個獎，我可以講嘅就係：我每日工作都係面對住一班非常專業嘅台前同幕後，所以我喺佢哋身上學到專業。」

Photo from TVB 截圖

接住落嚟，就係歐瑞偉。無論清裝、古裝、正派、反派、搞笑定戇直，都演得非常到位，近年亦越見搶手，幾乎好多劇集都會見到佢嘅身影！

Photo from TVB 截圖

歐瑞偉喺講得獎感言時 KC上身，公開話：「多謝我Terry，多謝你，我嘅拍檔！」搞到Terry面都紅晒～～佢哋真係好好感情啊！

Photo from TVB 截圖

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）