金牌司儀森美神圓場 轉數極快完美為許廷鏗解圍 獲得全場呼叫掌聲
喺琴晚舉行嘅《2018年度叱咤樂壇流行榜頒獎典禮》入面,大家嘅焦點都無疑落咗喺奪得「我最喜愛男歌手獎」嘅古天樂身上。不過其實現場都發生咗啲笑料,頓時尷尬癌發作!
當頒發「專業推介叱咤十大」第八位時,司儀之一兼負責頒呢個獎項嘅DJ梁文禮,就唔小心講錯歌手名啦!本應由周柏豪嘅老少平安奪得,梁文禮就宣布:「周國賢,老少平安!」呢個時候,空氣凝結時間停頓大約2秒,望住台下得知自己講錯歌手名嘅梁文禮,即刻尷尬補鑊「周柏豪,老少平安。」
之後都有其他DJ上台時拎返呢單笑料黎講笑。
而當尷尬癌發作嘅時候,唔緊要㗎!最緊要有人及時出黎幫你制止癌細胞擴散,而呢啲通常都會係司儀主持嘅工作,所以話臨場反應真係好緊要。大家都知道喺頒獎禮,每個得獎者發表感言時間有限,以免成個節目overrun得太勁。所以好多時候喺台上嘅主持人同得獎者都會被台下工作人員「圈」,提示佢哋夠鐘要快。
有啲主持人會適時地出聲,提醒得獎者「夠鐘啦喂」,但有啲可能為咗將呢個難得嘅發表感言時間畀得獎者慢慢講,咁呢個時候大會就會用其他方法,好似...
好似琴晚咁,許廷鏗獲得「叱咤樂壇男歌手銀獎」,獎項由森美宣布及頒發。許廷鏗喺台上發表感言達4分半鐘時,準備宣布下一個獎項(叱咤樂壇男歌手金獎)嘅聲效響起,同時大螢幕亦顯示「叱咤樂壇男歌手金獎」嘅字眼。令本身打算堅持講埋落去嘅許廷鏗停咗落黎:「所以我希望喺度...同大家講一句...」大會播放:「叱咤樂壇男歌手金獎」
台下觀眾瞬間發出笑聲,森美立刻打圓場:「(叱咤樂壇男歌手金獎)係你出年嘅目標」
許廷鏗立刻表示謝意:「多謝森美!」
臨離開舞台前都特登過去攬攬森美。
做慣司儀主持嘅森美,今次嘅極速轉數打圓場,除咗舒緩台上得獎者嘅尷尬情緒,仲贏得全場掌聲。
Photos from: ViuTv影片截圖
Text: Holiday Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)