《大帥哥》張衛健式長對白再現！網民細數張衛健經典金句：正字腔圓得佢做到！

一直被網民熱棒嘅《大帥哥》於今晚嚟到大結局啦！大結局除咗令一眾網民緊張又期待之餘，新一集《大帥哥》仲再現張衛健式經典長對白，令網民為之興奮，仲大讚「呢種急口令對白真係除咗張衛健之外無第二個」！令小編同一眾網民都忍唔住要重溫昔日張衛健式經典金句啊！

Photo from TVB《大帥哥》

新一集《大帥哥》喺後半段講到狄奇身穿大帥衫重返昇威鎮，沅婉同馬炭都感到非常驚訝，身為一個通緝犯都咁大搖大擺，令馬炭都一頭霧水，馬炭仲命令手下將大帥哥鎖起，可惜一眾手下造反保護狄奇。正當馬炭再叫人捉起「通緝犯」之際，張衛健式經典長對白再次出現啦！

Photo from TVB《大帥哥》

狄奇隨即指馬炭今次搞錯咗，自己並非以通緝犯身分返嚟，仲答佢「我係蒙大帥指定粵軍第一師司法部最高級別臨時審議庭特派使者暨昇威鎮、祿豐鎮、海豐鎮、天豐鎮南海四鎮海陸空三軍一日大元帥」！睇嚟大帥哥要返嚟啦！除咗同樣型到噴汁，對白仲令網民非常深刻，令人諗起以前西遊記句經典長金句啊！

Photo from TVB《大帥哥》

聽到張衛健呢句經典長對白急口令，當然要重溫下同樣由張衛健口中所講過嘅經典對白啦！

1. 《大帥哥》詩句
「命注定，運難卜，三衰六旺好難捉；仙灑脫，凡人俗，犯規和尚食狗肉；陽壽盡，落陰谷，生老病死乃定局。」除咗新一集呢句長對白外，《大帥哥》劇中仲有呢首詩句都令網民超深刻，而且非常洗腦！

Photo from TVB《大帥哥》

呢首詩其實係出自早前粵諺，有網民仲非常欣賞《大帥哥》加入呢類詩句：「如果唔係佢講，恐怕好多人都唔會知道呢啲有歷史同文化價值嘅對白」！所以今次《大帥哥》編劇可謂相當出色㗎！

Photo from TVB《大帥哥》

2. 《齊天大聖孫悟空》經典長對白
「我係如來佛祖玉皇大帝觀音菩薩指定取西經特派使者花果山水濂洞美猴王齊天大聖孫悟空！」聽到張衛健喺新一集嘅經典長對白，有唔少網民都話諗返起《西遊記》呢句金句啊！呢句對白都一眾觀眾都唔陌生，而且有部分觀眾更加係琅琅上口，真係好懷念啊！

Photo from 《齊天大聖孫悟空》劇照

有網民仲大讚「睇張衛健嘅劇佢咬字清楚到唔需要有字幕」！《齊天大聖孫悟空》當中仲有一句「噼啪你個隆的咚呀！」以及《西遊記》一句「Yo！駛乜驚啊！」都非常深入民心㗎！

Photo from 《齊天大聖孫悟空》劇照

3. 《小寶與康熙》
「涼風有信，秋月無邊，虧我思嬌嘅愁緒好比度日如年。雖則我唔係玉樹臨風瀟灑倜儻，但我有廣闊嘅胸襟加強勁嘅臂彎。」呢句雖然唔係人人都講得出，但大部分睇過《小寶與康熙》嘅觀眾就一定對呢句對白感到非常深刻啦！

Photo from 《小寶與康熙》劇照

當時呢部電視劇收視率為香港全年最高，力壓《尋秦記》，而張衛健所飾演嘅韋小寶呢句口頭襌簡直紅到街知巷聞啊！

《大帥哥》今晚就大結局啦！唔知張衛健飾演嘅狄奇又會唔會有咩殺手鑭冧觀眾呢？

圖片來源：TVB《大帥哥》、《齊天大聖孫悟空》劇照、《小寶與康熙》劇照

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）