機械人始終鬥唔過人？日本著名機械人酒店炒一半「機械員工」魷魚

隨住科技不斷發展，不時有傳言話機械人終有一日會取代人類，令人類員工面臨失業。不過日本著名機械人酒店近日就有機械人「集體被炒魷」，改返由人類擔任部份接待工作。咁睇機械人想同人鬥似乎「未夠班」喎！

日本佐世保嘅海茵娜酒店（Henn-na Hotel）由2015年開業至今，一直以機械人做接待員為招徠。酒店擁有達243位機械人接待員，位位各有特色。不過最近酒店就認為機器人嘅「工作表現」不似預期，將一半機械人員「炒魷」！

Photo from Henn na Hotel@FB

酒店原意係以機械人減少酒店人手，但卻發現機械人有時唔單止無法解決問題，反而調返轉需要人類員工幫返手。

好似每間房間內嘅公仔造型語音機械人「Churi」，「Churi」嘅用途係幫手答覆客人查詢，但好可惜佢就連當地店鋪、景點嘅開放時間都唔識答，客人用Siri、Google Assistant反而更幫到手！同樣地，設喺酒店大堂負責迎賓嘅機械人都出現應對客人提問嘅困難，結果當然通通被「提早退休」啦！

Photo from Henn na Hotel

Photo from Henn na Hotel

Photo from Henn na Hotel@FB

另外，負責幫旅客辦理入住手續嘅兩個速龍機械人，就因無法影印住客嘅護照，需要人類員工幫手而被解僱。講又唔得、做又唔得，咁搬吓嘢得啦卦？Sorry！酒店內兩部負責做Bellboy嘅機械人，只能夠將行李搬到100間客房中嘅24間，而且落雨、落雪時就用唔到，有時仲會兩部機械人塞喺通道郁唔到！

Photo from Henn na Hotel@FB

Photo from Henn na Hotel@FB

機械人員工問題多多，而且又會老舊損耗，酒店最終覺得請返人類員工比起提昇機械人功能更划算。不過有人類幫手，咁呢間機械人酒店仲算唔算係機械人酒店呢？

資料來源：The Verge

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）