年三十晚傳統習俗！食完團年飯 仲可以奉旨玩通宵？

今日就係年三十晚，無論平日幾忙，幾唔得閒番屋企食飯，今日都要抽時間同家人食團年飯！而且，今日有唔少公司都會畀員工提早放工，及早回家共享天倫。

Photo from shutterstock

年三十晚，家人齊齊整整食個團年飯，飯後食湯圓，就係寓意一家人齊齊整整、圓圓滿滿。

Photo from shutterstock

除咗食團年飯，年三十晚仲有唔少傳統習俗。

1.賣懶
食完團年飯之後，小朋友就會拎起燈籠、紅雞蛋同香，大唱「賣懶，賣懶，賣到年三十晚！」，寓意新一年要戒甩懶惰！呢個係廣東人過年習俗，不過近年已漸趨少見！

Photo from shutterstock

2.用碌柚葉沖涼
開講有話：「年廿八，洗邋遢；年廿九，洗碌柚！」有人就話年廿九要用碌柚葉水抹房或洗身可以去霉氣。但近年，普遍市民就會係年三十晚先用碌柚葉沖涼，寓意喺一年嘅最後一日，洗走霉氣，迎接新一年。

Photo from shutterstock

3.守歲
根據以往嘅傳統習俗，農曆新年前，年長嘅、細路哥都要「守歲」。「守歲」嘅意思，代表唔瞓覺，年長長輩守歲就係為咗「辭舊歲」，有珍惜光陰，珍惜餘下日子嘅意思；而細路哥、人家嘅孩子守歲，就係為咗保佑父母、長輩能夠長命百歲，身體健康。換句話說，細路喺年三十係「攞正牌」通宵咖～

Photo from IG@louischeung2013

Photo from IG@louischeung2013

傳統習俗嘅嘢「信則有，不信則無」，但身為廣東人，都好應該將呢啲傳統習俗好好保存落嚟。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）