長假過後...5個新年後遺症 睇吓你又中咗幾多樣呢？

新年假期話咁快就過完喇，唔少人都喺上星期五（初四）都已經開工大吉喇！唔知有冇人會選擇請多日假，聽日先正式開工呢？

Photo from 電影《行運一條龍》

不過相信經歷數天長假嘅你，返工嗰日必定係「滿臉頹氣」。以下5個必遇嘅新年放假後遺症，你又中多少樣呢？

1.生理時鐘顛倒

每次放假，生理時鐘就會嚴重顛倒。即使你冇去歐遊，喺香港都可以生活到歐美時間。不過一到假期完結，開始要返學返工前一日你就知和味喇！

Photo from shutterstock

2.一日三餐年糕

每逢佳節都會有各種應節食品出現，一開始大家都會熱烈地期待話想瘋狂食。不過當你一日三餐，甚至可能一日五餐咁食嘅情況雨，即使你對佢哋有幾熱愛都好，你都會有嗌救命嘅時候。

Photo from PressLogic

3.身材走晒樣

新年除咗拜年逗利是之外，唯一嘅活動就係喺屋企瘋狂loop依個「瞓、食、瞓、食」嘅生活模式。咁樣生活咗咁多天，都難怪身型會走晒樣嘅，不過唔緊要喇咪當應吓今年豬年囉！

Photo from shutterstock

4.節日性賣笑

唔好以為逗利是係一件簡單輕鬆嘅事，首要條年係你要笑容可掬，再加上你超強嘅記憶力同埋超至嘅語文能力去恭賀你嘅親戚。即使對著一個你一年可能都見唔到對方幾次未婚嘅親戚，你都要同她講「青春常駐」；除咗親戚們之外，仲有公司更是如此，對住平時成日令你有開工冇收工嘅上司，你更要笑容滿面同佢講「龍馬精神」「步步高陞」，真係辛苦晒喇！

Photo from shutterstock

5.遙遠嘅假期

無論係學生定係上班族嘅你，新年最重要就係「有假放」，可以瞓到自然醒。假期好快就放完，而下一個公眾假期最快都要等到4月嘅清明節。係咪好開心呢！？

Photo from Google Calendar

不過點都好，放假就要開開心心，放完假就要好好努力工作喇！

Text：Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）