二戰經典「勝利之吻」男主角逝世 終年95歲 距離佢96歲生日僅兩日

一張上世紀最經典嘅相「勝利之吻」，代表咗二戰嘅完結，而呢張相嘅男主角門多薩（George Mendonsa）喺上星期日（2月17號）逝世，終年95歲。

1945年8月15號（美國時間14號），日本宣布無條件投降，呢一日亦係二次大戰抗戰勝利日，當日美國一名水軍門多薩同其他人一齊喺紐約時代廣場慶祝抗戰勝利，並深情親吻一身穿護士服嘅女士。

Photo from Alfred Eisenstaedt

佢哋擁吻一幕被攝影師影咗落嚟，更成為經典嘅抗戰勝利代表照片，獲命名為「勝利之吻」。

門多薩2012年接受訪問時憶述：「戰爭結束令我覺得非常興奮，再加上已經飲咗幾杯酒，當我見到嗰個護士，就拉住佢，彎腰吻佢」

Photo from Getty Images

事實上擁吻嘅兩個主角完全係陌生人，根本唔認識對方，女主角叫弗里德曼（Greta Zimmer Friedman），係一名護士，佢出生喺奧地利，當年21歲，為逃避納粹德軍而同兩個妹妹去到美國。抗戰勝利當日佢知道日軍投降後去時代廣場慶祝，點知被陌生人擁吻，弗里德曼曾經提過：「只係慶祝戰爭勝利，並唔浪漫。」

Photo from Pinterest

呢張相經典到喺美國加州聖地牙哥都有「勝利之吻」嘅雕像。

Photo from shutterstock

二人喺擁吻後分道揚鑣，而門多薩女友，後來成為佢妻子嘅佩特里（Rita Petry）其實都有出現喺當日嘅經典照片入面。

「勝利之吻」嘅女主角弗里德曼已經喺2016年過世，終年92歲。而男主角門多薩同妻子喺美國羅德島米德爾敦（Middletown）住咗超過70年，今個月17號佢喺療養院不慎跌倒，隨後癲癇發作救治無效，當天距離佢96歲生日只有兩日。

Photo from 美聯社

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）