李慧詩3日連奪兩次世界冠軍 生涯累積代表冠軍3件「彩虹戰衣」創香港單車壇歷史

有「牛下女車神」之稱嘅李慧詩喺波蘭普魯斯科夫舉行嘅世界場地單車錦標賽凱琳賽決賽中，再奪金牌成為雙料世界冠軍，再創香港歷史！

上星期五舉行嘅女子爭先賽，李慧詩已成功奪得金牌，今次喺強項凱琳賽再下一城，一屆兩奪世界冠軍，創造歷史。

Photo from 電視截圖

2012年倫敦奧運，李慧詩就奪得凱林賽銅牌，到2013年出戰世錦賽500米計時賽一舉奪冠，攞到第一件象徵世界冠軍嘅彩虹戰衣。

Photo from 電視截圖

3年之後里約熱內盧奧運凱林賽，李慧詩喺賽事中途發生意外，遺憾未能取得獎牌，後來佢嘅教練猝逝，令佢大受打擊曾諗過退役。2018年強勢歸來，喺亞運連奪2金1銀，再創高峰。

今年31歲嘅李慧詩狀態大勇，喺女子爭先賽事隔5年再奪冠軍，收獲彩虹戰衣，而上屆凱琳賽屈居亞軍嘅李慧詩今次擊敗眾多勁敵重奪金牌，成為首位喺同一屆世錦標兩奪彩虹戰衣嘅香港人！

Photo from 電視截圖

Photo from 電視截圖

而香港亦憑住女車神嘅兩面金牌，喺總獎牌榜位列第3，僅次荷蘭同澳洲，李慧詩為香港再次爭光。

Photo from 電視截圖

Photo from 電視截圖

賽後李慧詩都好興奮，佢表示：「可以再奪彩虹戰衣實在係難以置信！希望可以保持呢個狀態直至奧運。」

李慧詩果然係「女車神」，為港爭光，好犀利啊！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）