【遊日攻略】日本便利店6大必吃清單！小編私心推介！難以想像便利店商品有咁好食！

By Jackie on 29 Mar 2019

Digital Editor

去日本旅行除咗到景點打卡之外，唔少得嘅當然係行便利店，然後食、食、食啦！Family Mart、Lawson、7-11等等便利店總有一間喺左近，入面嘅產品更加係應有盡有！可惜旅行嘅短短幾日邊食到咁多嘢啊，究竟有咩必吃便利店小食係千萬不能錯過？小編而家就為大家嚴選日本便利店必吃小食，遊日時記得跟住以下Must Buy Items掃貨啦！

Photo from Shutterstock

1. 便利店炸雞塊
日本便利店嘅炸雞塊絕對要放喺清單嘅第1位啊！小編已率先為大家試食7-11、Family Mart同Lawson炸雞塊，發現3間其實都非常好食，而且價錢便宜，只需港幣約13蚊，仲有幾隻味揀！如果要揀一間嘅話，小編就覺得Lawson嘅炸雞塊更略勝一籌！

Photo from Lawson.co.jp

不過最近Lawson社長接受雜誌訪問時提到，仔仔食過Family Mart炸雞後不斷盛讚Family Mart炸雞好好食，身為Lawson社長嘅爸爸真係一額汗啊。而且有唔少日本人都覺得Family Mart炸雞不過好食，所以真係各便利店都不相伯仲，大家記得遊日時食便利店炸雞塊啦！

Photo from FB@familymart.japan

2. Lawson蛋糕卷
Lawson嘅蛋糕卷同樣非常好食！仲有香港網民直指「Lawson瑞士卷世界級！」，絕對係值得一試啦！

Lawson蛋糕卷非常適合當作夜晚嘅飯後甜品，小編起初以為蛋卷會好滯，打算分開幾日食，結果因為太好味一下子就清光！連唔太中意食甜食嘅朋友都覺得好好食啊！外層海綿好有彈性，入面嘅奶油餡好綿，而且絕對唔會過甜，同一般香港蛋卷嘅餡好唔同，即使平時唔太中意食甜品嘅朋友都可以試下！

Photo from Lawson.co.jp

3. 森永乳業MOW雪糕
MOW雪糕其實香港便利店都有售，不過價錢貴一倍之餘，味道選擇都唔多，所以去日本當然要以超平價值食盡所有口味！森永乳業專門生產乳製品，所以云呢拿牛奶味當然無庸置疑咁好食，不過云呢拿味比較普遍。

Photo from 森永乳業株式会社

而小編就覺得「焦糖牛油味」非常出色，味道香濃，而且帶苦嘅抹茶味都非常好食，唔會太苦，苦度剛剛好，好啱中意帶苦味嘅抹茶控！溫馨提示：到超級市場買嘅話價錢會更平，約港幣8蚊已經買到！

Photo from 森永乳業株式会社

4. 抹茶大福/宇治抹茶蕨餅
如果大家係抹茶控，Lawson嘅抹茶大福或者7-11嘅宇治抹茶蕨餅就絕對要買嚟試下啦！7-11嘅宇治抹茶蕨餅，表層用1.2倍抹茶製造，所以味道微甘，適合唔中意苦味太重嘅朋友，而中間嘅黑蜜醬餡甜度啱啱好，混合抹茶嘅微甘，真係Perfect Match！但要留意日本包裝跟香港會有唔同，而且價錢都會平好多啊！