電影《素媛》原型犯人明年出獄 妻子11年持續探監 搬屋到受害者家1公里：我唔在乎佢住邊

韓國電影《素媛》講述一名女童慘遭犯人強姦，而電影根據真實事件改編。

呢件案件發生於2008年，當年僅8歲嘅娜英返學途中被趙斗淳誘拐而遭禍。過程中趙斗淳不停施暴，導致娜英身體永久受損，腸臟流出體外，需加裝人造肛門同終生使用尿袋。

Photo from 《素媛》

事件中嘅犯人趙斗淳以飲醉為由僅被判12年，事件已過去11年，出年趙斗淳就會出獄，重返社會。

但根據心理報告，趙斗淳不但毫無悔意，而且重犯機會極高。

Photo from 《素媛》

韓國節目就甘冒違法風險，公開趙斗淳嘅肖像，而最近節目更發現案發後趙斗淳屋企距離受害者僅500米，趙家搬屋後仍喺受害人屋企1公里範圍內，開車唔到3分鐘。

節目組訪問受害人嘅爸爸，佢表示本來同阿女約定唔接受任何訪問，因為唔想再回憶起以前惡夢咁嘅日子，但佢知道咗趙家就喺自己屋企附近覺得非常可怕：「我哋應該搬屋嗎？定係要直接離開地球？點解係受害者四圍逃亡？」

Photo from 《素媛》

記者更搵到趙斗淳嘅妻子，據知佢丈夫犯案後佢並無離婚，呢11年嚟都有去探監。

佢仲話：「（丈夫）唔飲酒喺屋企幾好，飲咗酒先會咁（犯案）」提到受害人就住喺附近佢情緒變得激動：「我唔在乎呢種事！嗰個人（指受害人）要住邊我唔知都唔在乎，我根本唔想知道呢啲嘢！」

Photo from 《素媛》

趙斗淳出獄後好可能就住喺距離受害人屋企1公里範圍內，呢件事令人震驚，但根據憲法，韓國國民擁有居住遷移自由，所以就算趙斗淳真係住喺嗰度都無辦法阻止到。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）