挪威超過200隻馴鹿餓死 全因氣候變化、食物缺乏所致

氣候暖化係全球現正面對嘅嚴峻問題，除咗天氣越嚟越熱，生態系統都同樣出現問題。

最近挪威嘅研究人員喺北面嘅斯瓦巴群島（Svalbard）發現大量馴鹿屍體，數目超過200隻。

Photo from Norsk Polarinstitutt

其中一位研究員表示因為全球暖化嘅原因，舊年12月斯瓦巴群島罕見地出現暴雨，雨水落喺地上結成冰，形成冰層覆蓋住苔原令馴鹿無法喺苔原上搵嘢食，最後餓死。

咁龐大數量嘅馴鹿死亡係前所未見，亦都係極地研究所調查當地生態40年嚟首次發現咁多死亡馴鹿。

Photo from Pinterest

另一名研究員指出，馴鹿係北極圈最大嘅草食性動物，對北歐、北亞、北美嘅生態系統非常重要，大量馴鹿餓死會對北極圈生態造成極大影響。

Photo from Pinterest

斯瓦巴群島有超過6成地區屬於自然保護區，但保護區內嘅動物雖然唔受人類影響，但仍然無法避免死亡嘅命運，可見全球暖化嘅危機越嚟越大。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）