逢星期一自由放假半日！日本公司推行Super Happy Monday 助員工提高工作集中力

每逢星期一梗係有一種莫名嘅庸懶感，無論你過去嘅星期六/日中休息有幾充足，只要一到星期一返工，做起事嚟總會提唔起勁，俗稱Blue Monday。

Photo from PressLogic

有見及此，喺日本就有一間IT企業Supership實行咗一個新制度，就係全公司嘅員工可以自由選擇逢星期一嘅上午放半日有薪假期，仲唔需要以其他日子填補放假嘅時間，佢哋稱之為「Super Happy Monday」！

Photo from supership.jp

Supership指佢哋喺正式推行前先進行咗一個為期兩個月嘅測試，量度員工上班時間、滿足度等。

以每星期休假嘅員工嚟計，平均每個星期一嘅上班時間減少大概2小時左右，整個月即亦減少約8~10小時，而佢哋亦冇因為星期一休息半日而額外增加工作時間。所以管理層相信，措施對公司嘅整體運作所造成嘅影響係有限。

Photo from supership.jp

而喺正式推行後，每個星期約有一半員工（當中包括每星期或偶爾）選擇請假。部份嘅員工就會趁此空閒去銀行、診所等處理私務，或去健身室做運動後再上班，畢竟平日使用嘅話人少之外，收費仲伯會比假日平。

Photo from supership.jp

Supership強調新措施唔止可以令員工嘅健康情況有所改善，仲可以提高工作集中力，令工作可以喺比以往較短嘅時間內完成。

Photo from PressLogic

不過措施當中亦存在一個問題，就係唔係每一間公司嘅員工都同你一樣會推行依個措施，所以可能會造成喺星期一早上搵唔到人嘅情況出現，因此他哋建議，如果真係要實行，就要事前通知好其他公司避免有搵唔到人嘅情況發生。

唔知香港會唔會有公司咁做呢？！

Source：Supership

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）