韓國33年懸案「華城連環殺人事件」鎖定兇手 已被判終身監禁

韓國電視劇《Signal》同電影《殺人回憶》嘅案件原型「華城連環殺人事件」一直未能破案。

懸案33年後，終於通過DNA確定兇手身分，佢因犯事而被判終身監禁，正在服刑。

「華城連環殺人事件」係1986年至1991年發生嘅10單姦殺案，10名受害者中僅有一位倖存，案件轟動一時但就一直未能破案。

案件發生至今已有33年，期間被改編成多部影視作品，包括2003年上映，由《上流寄生族》導演奉俊昊執導嘅《殺人回憶》，男主角係出演《上流寄生族》嘅宋康昊，以及韓劇《Signal》、《隧道》等。

Photo from 《殺人回憶》

Photo from 《Signal》

韓國警方2019年成立專案調查小組，以現代醫學科技對比當時嘅DNA，終於隔33年後，成功搵到正在服刑嘅李某。

李某現年50幾歲，1994年因為侵害妻子嘅妹妹而被判無期徒刑，根據李某嘅年齡推斷佢犯下第一件案件時年僅17歲。

Photo from Naver

喺《Signal》入面，女主角曾經講過一句：「就算只沾上小小的血跡，就算過咗10年、20年，100年都好，都可以驗測到DNA，呢個就係現代醫學送俾受害人嘅禮物！」

Photo from 《Signal》

《殺人回憶》入面最經典嘅一幕，就係電影最後由宋康昊飾演嘅刑警直直凝望住鏡頭，導演奉俊昊表示：「我相信犯人都一定會去戲院睇《殺人回憶》，所以最後一幕係想刑警同睇緊戲嘅犯人對視。」

呢件案件被稱為係韓國三大懸案之一，而案件嘅公訴期喺2006年4月2號到期，所以即使搵到犯人，佢亦無法受法律制裁，不過由於韓國民眾對案件非常關注，所以警方考慮公開疑犯嘅身份信息。

喺確定疑犯身份後，當時負責此案嘅警員信件亦曝光，佢直至離任仍一心想逮捕兇手，喺信嘅結尾向兇手講：「請務必唔好早死過我，我哋必定會見面，係咪？」

Photo from 《Signal》

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）