【金宵大廈】東東「消失」寫實描寫學童壓力 「原來有啲人唔係贏在起跑線，係未起跑已衝線」

近排《金宵大廈》討論度極高，因為當中嘅單元劇都有令人有唔少嘅反思同隱喻，而尋晚《鴉烏》所講東東失蹤一事，其實帶出咗唔少香港社會現象，令觀眾有好多唔同嘅共鳴同反思，唔少網民睇完都好感慨。

《金宵大廈》播出以嚟口碑好好，幾有懸疑感之餘，睇完會有反思位。尋晚個集《鴉烏》當中帶出唔少深層意思，睇完有啲台詞仲會有種戚戚然嘅感覺，好似「原來有啲人唔係贏在起跑線，係未起跑已衝線」、「我唔想做大人，我唔想長大」。

Photo from tvb

好似香港嘅小朋友年紀輕輕，就要接受唔同嘅壓力，唔單止喺學校，仲有屋企、社會等各方面都會施加壓力。東東參加名校面試，成家人都要背好晒啲可能會問到嘅答案，佢自己就仲要表現埋英詩。

到真正面試嘅時候，東東臨場失準，佢爸爸媽媽仲嘈咗場大交，爸爸嬲得制轉身走咗，東東喊住追住爸爸嘅背影令人好「心up」。到媽媽返到去見到爸爸醉咗，先發現東東唔見咗，最奇怪係除咗佢地兩公婆同Alex，所有人都唔記得東東嘅存在，甚至連東東存在嘅證據都消失埋。

Photo from tvb

當中仲隱喻其實東東已經自殺，所以畀鴉烏帶走。而爸爸媽媽搵東東嘅時候，鴉烏畀佢地睇到「東東視角」面試個日發生嘅事，就係有錢同學同東東講咁努力練英詩做咩，東東話呢間名校好難考，要練得熟啲。個同學先嘲笑佢咁講，佢爸爸捐咗1百萬畀學校，佢實入到間名校，係佢媽咪叫佢做下樣嚟面試。從而先解釋到點解東東正式面試時，一句英詩都唔背出嚟。

Photo from tvb

當下佢地先知東東所承受嘅殘酷現實，「原來有啲人唔係贏在起跑線，係未起跑已衝線」，就算佢幾努力都無用，都達唔到媽媽對佢嘅期望，爸爸媽媽依然會嘈，依然會打算離婚，所以東東揀咗「跟鴉烏走」，唔想做大人，唔想長大。

Photo from tvb

呢個單元講嘅係唔少有小朋友嘅屋企都出現嘅情況——父母為咗畀小朋友更好嘅生活，掛住做嘢忽略小朋友，甚至將小朋友推畀其他人照顧。同時對小朋友缺乏關心，只會好著重成績、面試、興趣班等等嘅事。

Photo from tvb

同時都寫實咁描寫社會嘅唔公平同無奈，有啲人一出世可能已經贏咗，就算小朋友幾努力咁掙扎求存，都唔及有啲人咩都唔駛做就直達佢地嘅目標。

而東東嘅「消失」在於香港人嘅善忘，發生咗事係會引起一陣嘅關注，但時間耐咗，就會慢慢咁無人再記得。好多事發生咗就係發生咗，唔應該由佢過去，而係好好咁記住呢一切。

到最後連媽媽都唔記得咗東東，但爸爸記得，個下好深刻感覺係當所有人都唔記得，一個人就會真正咁消失。

Photo from tvb

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）