【日本交通2019】熊本縣新推免費接駁巴士來往機場至4市町　想搭記得提早預約喇～

唔知大家仲記唔記得2016年時日本地震，當時日本九州熊本縣必到景點 - 熊本城亦有受到損壞。

最近熊本城就已經完成復修，並已重新開放參觀。

Photo from 熊本城

而熊本縣政府就為咗方便更多旅客到訪熊本縣，佢哋將提供連接熊本機場至縣北嘅4個市町嘅免費接駁巴士服務，等訪客可以慳錢之餘又省時。

Photo from kyusanko.co.jp

免費接駁巴士將於11月、2020年1月及2月試運行3個月，由熊本縣北觀光協議會及九州產交巴士合作提供。

接駁巴士有兩條路線，一條係逢周二、五及日由玉名市往返阿蘇熊本機場嘅路線（每日1班）。

Photo from kyusanko.co.jp

第二條就係逢周一、三、四及六，由熊本市內嘅熊本站，往返熊本縣北面嘅3市1町嘅路線（每日2班）。

Photo from kyusanko.co.jp

只要係乘坐阿蘇熊本機場國際航班或喺玉名市、和水町、山鹿市及菊池市住宿、觀光嘅旅客，都可以乘坐依架免費接駁巴士。

不過有一樣必須提提大家，依架免費接駁巴士係採用預約制，如果想要乘坐嘅旅客就必須先在喺網上預約，最遲可於行駛日期前一日嘅下午4時前預約上落車地點。

預約步驟仲好簡單添～只需選擇搭車嘅日期、時間、地點，選好之後填上個人資料同觀光目的地等就可以。

Photo from kenhoku-shuttlebus.resv.jp

巴士只要有1人預約都會運行，所以唔使擔心班次會因為人數不足而取消問題，但係如果該時段嘅班次喺3日前冇人預約就會取消㗎喇！

Photo from kyusanko.co.jp

另外，車內仲設有免費Wi-Fi，方便大家搭車之餘都有網絡使用。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）