42年嚟首次！港台宣布今年取消「十大中文金曲」 頒獎典禮 改播特備節目

又到年尾，係各大頒獎禮派成績表嘅日子，不過自特首推出逃犯條例後，本港不時舉行示威活動，唔少演唱會都取消。

而舉辦咗42年嘅「十大中文金曲」 頒獎典禮今年亦宣佈取消。

香港電台指因為近月社會氣氛，加上為咗歌手同fans參與公眾活動時嘅安全著想，今年將會暫停舉辦「第42屆十大中文金曲」頒獎禮同音樂會。

Photo from 香港電台

Photo from 香港電台

「十大中文金曲」 頒奬禮本來將於下個月13號舉行，而音樂會就會喺出年1月13號舉行。

港台宣布取消「十大中文金曲」 頒奬禮，將改為製作特備節目，總結香港樂壇2019年嘅成績同宣佈所有得獎結果。

Photo from 陳柏宇 IG

特備節目將於2020年1月下旬，喺港台電視31、香港電台第二台同埋香港電台網站播出，到時將唔會邀請歌手或fans參加。

Photo from AGA IG

上年「最優秀流行男歌手」同「最優秀流行女歌手」分別係張敬軒同謝安琪，而「十大中文金曲」就有張敬軒《缺》、陳奕迅《漸漸》、周柏豪《男人背後》、陳柏宇《認真如初》、Gin Lee《很堅強》、Supper Moment《橙海》、AGA《小問題》、許廷鏗《停半分鐘聽一闋歌》、謝安琪《一個女人和浴室》、方皓玟《假使世界原來不像你預期》、吳業坤《孝順》、胡鴻鈞《到此一遊》。

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）