蘇玉華因年輕人而覺醒：「年輕人教曉咗我好多嘢」離巢2年重提TVB拍劇日子

現年51歲嘅蘇玉華，2017同TVB約滿離巢，最近佢上電台節目《瘋Show快活人》，重提喺TVB拍劇嘅辛酸，佢又提到自己以往欠缺咗公民身份嘅意識，但最近因為年輕人而覺醒咗。

Photo from RTHK 香港電台

蘇玉華接受電台訪問時透露喺TVB拍劇係人生最辛苦嘅事，佢仲話嗰段日子唔係人過，因為佢初頭入TVB拍劇嘅時候，仲未係部頭合約，派咩工作都要接。佢又憶述：「我好記得有一日，同時接緊三套劇集，當然唔係套套都好重戲，但都要做，要付出時間。有次PA俾叠通告嚟，係一疊，拼埋一齊睇嘅時候，我喊。基本上你見到嚟緊嘅日子冇得瞓」，仲直言呢段日子係「唔係人過嘅日子」。

Photo from 蘇玉華FB

後來蘇玉華轉為部頭合約，希望可以自己揀工作做，佢亦都表示：「最痛苦係你係付出咗，冇得瞓、好攰，但你知道自己有可能一半以上時間拍緊垃圾，嗰個係最痛苦。」但佢都仍然相信電視台仲有好多人努力做好，唔希望佢地嘅努力被抹殺。

Photo from 蘇玉華FB

Photo from 蘇玉華FB

提到目前嘅生活，蘇玉華表示好滿意而家嘅生活，但就覺得自己以往欠缺咗公民身份嘅意識。佢認為喺而家嘅社會狀態，除非你咩都唔理，否則你會不斷問自己問題，想去知多啲。喺呢個過程中覺得年輕人教曉咗好多嘢，覺得自己「覺醒咗」，原來有啲嘢自己係忽略咗，仲有好多嘢係值得自己去學、去思考、去關心。

Photo from 瘋Show快活人

Photo from 蘇玉華FB

佢亦認為喺呢個過程中，感到自己同香港同埋香港人應該要有更強嘅連結，而唔係淨係做好自己咁簡單，「當你投入、當你關心嘅時候，你係會畀到一啲力量出嚟，大家係會走埋一齊做啲更加美好嘅事。」

Photo from 蘇玉華FB

關心年輕人嘅佢仲認為社會應該除咗關心自己之外，亦都要關心下一代，因為未來嘅日子係屬於佢地。

Photo from 蘇玉華FB

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）