森美黃昏登山諗起香港感鼻酸 電台點播母校校歌寄意：希望大家珍重

香港近日有連串示威活動，有唔少藝人都有發聲。

其中上星期中大就發生咗激烈嘅示威活動，而商台當日取消常規節目，俾聽眾憑歌寄意。而身為中大舊生嘅DJ森美第二日開咪都忍唔住哽咽。

森美當日主持《早霸王》時，哽咽播出王苑之《天堂有路》，表示：「人間未到絕路，努力！」拍檔小儀亦都話：「大家都係香港人，我愛香港」節目中佢哋更讀出聽眾嘅留言。

Photo from 森美Facebook

喺中大畢業嘅佢更播埋中大新亞書院嘅校歌《明志》，佢話自己做咗DJ咁耐，一直都好唔中意「將歌詞送給聽眾」呢個行為。

但佢指：「好多自己憎嘅事喺非常時期都要做，今日點憎都要將歌詞送俾大家，希望大家珍重。」

Photo from 森美Facebook

森美琴日亦都喺IG post咗一張黃昏相，佢話：「今日黃昏上山，望著煙霞，感覺有點催淚、有點鼻酸，就是現在的香港」

Photo from 森美Facebook

森美之前喺721元朗事件發生之後，都有喺電台節目中表示：「唔明白作為香港人身份可以做到啲咩，令香港可以變返以前嘅香港。」

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）