至潮至夾外賣點心新配搭！7款必食中式點心餐廳+靚茶推介隨時都嘆到酒樓嘅味道！

By Ivory on 28 Nov 2019

Digital Editor

香港人不嬲都鍾意飲啖茶，食下點心，不過平日一早就要起身返工，Lunch又得1個鐘，冇咩時間排隊等位，星期六日就想瞓晏啲，錯過咗食點心嘅最好時刻～好彩依家多咗好多點心外賣店，加埋支隨時買到嘅樽裝茶，咁就可以隨時隨地食到高質點心同嘆到靚茶啦！

去酒樓就一定有必食嘅點心咖啦，唔知以下呢7款中式點心又係咪你哋嘅必點之選呢？點心外賣店又會唔會有得賣呢？小編推介以下7款人氣點心，一定要試下呀！

1.燒賣
酒樓食到嘅燒賣都係皮好薄，鎖住咗豬肉嘅肉汁，令佢唔會「乾噌噌」，雪藏嘅燒賣真係比唔上咖！最吸引我嘅一定非香菇豬肉燒賣莫屬啦！超有咬口，口感超正啊～有人話食燒賣一定要點豉油同辣椒油，又有人話要點豆瓣醬～繼我話，好食嘅燒賣，唔使點醬料都可以好滋味！

Photo from HolidaySmart

2.牛肉球
唔少酒樓會用肥豬肉整山竹牛肉球，再加啲馬蹄、芫荽碎等，最重要梗係要用山竹點埋可以提升成個牛肉球味道嘅喼汁啦！食落去好滑、好彈牙，好好食～

小編推介：喺元朗燒賣皇后妙舒就可以食到酒樓味道嘅燒賣同牛肉球啦～

3.腸粉
食腸粉最緊要係咩？米漿！米漿夠滑，食到嘅腸粉就會滑捋捋！日日蒸腸粉嘅腸粉係即叫即整就夠哂滑，保證新鮮！老闆提醒大家，記得要趁熱食，腸粉食落更滑，唔會「淋」到爛，蒸到恰到好處！佢仲自創唔少新式腸粉，例如荽茜雞蛋腸、招牌五寶腸等～佢主要做外賣，又或者你可以喺舖頭出面立食，隨時隨地都食到滑捋捋腸粉啦～

Photo from HolidaySmart

4.蝦餃
蝦餃又係去酒樓必食嘅！晶瑩通透嘅皮，包住彈牙鮮蝦同豬肉，肉汁鎖晒係入面，一啖擺落口，認真惹味～一哥點故將普通蝦餃改良成味黑松露蝦餃，佢嘅黑松露唔會蓋過鮮蝦嘅味道，亦保留住一貫通透嘅薄皮，真係好好食咖～除此之外，佢仲有唔少酒樓必點嘅點心，例如流沙奶黃包，入面嘅流沙奶黃餡，一咬開就流晒出嚟！食落去有一股濃滑嘅奶香添～

Photo from HolidaySmart

細細個去酒樓最鍾意食炸嘢～所以一定會嗌煎堆仔！「一哥點故」嘅紫薯流汁煎堆仔同酒樓食嘅口感一模一樣，仲加咗流汁效果，好睇又好食！最正係咩？係佢所有嘅點心都可以外賣帶走，夠晒方便，簡直係「行走中嘅酒樓」！

Photo from HolidaySmart

5.糯米雞
唔知有冇人同小編一樣，細個會叮珍珠雞做早餐，食落去好硬、味道都冇酒樓嗰啲咁好食！珍珠雞就係糯米雞嘅迷你版，一樣係用荷葉包住糯米，入面放雞肉、冬菇、臘腸等材料，會落埋蠔油同其他調味做餡料。等小編帶你搵好食嘅糯米雞啦！包點先生除咗包點（例如熱辣辣嘅紫薯包）整得出色之外，佢嘅糯米雞同樣咁有水準！一打開會飄出陣陣荷葉味，而且裡面非常足料！唔止啊～炸雲吞同魚翅餃都好有酒樓風味～大家一定要去試下！