郭富城千字文回顧戶外慈善show 籌得過百萬善款：我堅定決意為大家做點事

喺過去嘅星期六，郭富城為幕後Dancers同電影人籌款，舉行《郭富城鼓舞．動起來Online Concert 2020》網上直播音樂會。

54歲嘅城城，喺戶外勁歌熱舞足足1個鐘，但仍帶來高水準嘅表演。

佢嘅努力成功為呢個慈善活動籌得超過100萬善款！佢琴日喺社交平台post出千字文，回顧呢個慈善show。

佢提到自己係舞者出身，一定不忘初心：「得到幕後團隊關顧的養份，所以，我堅定決意為大家做點事。」

呢場慈善演出由商討、研究、到落實，唔夠10日：「完全是基於一份『有福同尋有禍願意分』的互助精神，而燃起這團火。」

佢指「有能力幫助別人是做人的福氣，我很開心，有這份福氣和百位並肩作戰的戰友，在一個空曠平台，沒有華衣美服、沒有升降台、沒有燈光煙火、沒有化妝間、沒有空調的狀況下，流著豆大的汗水，開心齊心地飛揚起舞，這份力量實在太震撼了」認為呢個《鼓舞·動起來慈善演唱會》喺佢嘅演唱會紀錄上必須占有重要一頁。

最後佢表示：「希望我演出的歌舞和發放的鼓勵，可以帶給大家一些快樂和正能量。我永遠記得這一天，百人共舞，一起鼓舞動起來。。為大家打氣。。為香港打氣。。」

呢個《鼓舞·動起來慈善演唱會》雖然已圓滿結束，但會喺平台上架一個月時間，所以捐款行動仍然繼續。

所籌得善款將不扣除任何開支，全數透過郭富城國際慈善基金分配予各個合資格嘅專業舞蹈員及電影業界基層工作者。