Netflix 超人氣燒腦劇《Dark 闇》劇情錯綜複雜　網民：要邊睇邊畫人物關係圖

By Celia on 10 Jul 2020

Digital Editor

要數近年 Netflix 中嘅人氣影集，除咗有大家熟悉嘅《紙房子》、《怪奇物語》同《黑鏡》等之外，仲有一套自開播以嚟都係唔少人熱討嘅話題影集嚟，依套就係《 Dark 闇》！依套劇仲曾被外國著名劇評網「爛番茄」 Rottentomatoes 選為 Netflix 史上最佳劇集添～而影集嘅第3季早前亦已喺 Netflix 上架！

Photo from Netflix

《 Dark 闇》自2017年開播以嚟一直廣大好評，故事一開始係發生喺 2019 年德國嘅一個名為溫登嘅偏遠小鎮。一日當地突然有一名男孩神秘地失蹤，為平靜嘅小鎮投下震撼彈，小鎮嘅居民人心惶惶，但依知只係事件嘅開端‥‥幾日後，鎮上又有另一名男孩無預警咁喺樹林消失，令人諗起鎮上 33 年前亦有類似嘅失蹤案發生，究竟小鎮與失蹤案之間存在咩關聯，當地嘅四個家族又藏住咩秘密同糾葛？

Photo from Netflix

有睇前兩季嘅大家，都知道依套劇到底有幾令人「諗爆頭」，因劇情錯綜複雜，編劇嘅縝密架構，結合超自然、驚悚、懸疑及科幻等元素，再加上詭譎神秘嘅黑暗氛圍，令人有一種一開始咗睇就無法抽身嘅感覺，因此影集更被網民稱為成人版《怪奇物語》，係暗黑劇集嘅代表作嚟。

有網民更指要一邊睇、一邊做筆記，記低人物關係圖，但都未必可以搞得清前文後理。

Photo from Netflix

而《 Dark 闇》嚟到第三季，可以話係整個故事嘅結局嚟，故事承接上兩季劇情，節奏更明快，即使掀出多個平行時空，都冇上兩季咁複雜難明，主角 Jonas（一名難以接受父親自殺嘅青少年）得喺世界末日來臨嘅一刻，終結佢整個「時光旅人」嘅悲情輪迴，但喺危急關頭下，Martha（ Jonas 嘅愛慕對象）突然出現，表示自己嚟自第二個時空，要帶領 Jonas 走向另一段旅程，令「Everything is connected」嘅真正意義更深刻，同時亦如預告所言，開始就是結束、結束就是開始。