林子博太太病情轉差要打嗎啡止痛 標靶藥費高昂林子博努力工作：對太太好嘅乜都得

藝人林子博太太董燕君去年患上罕見癌症「平滑肌肉瘤（腹腔）」，今年試全新標靶藥，副作用好大，要打嗎啡止痛。而且藥費高昂，林子博密密接job：「對太太好嘅乜都得」

藝人林子博太太董燕君去年患上罕見癌症「平滑肌肉瘤（腹腔）」，一直接受化療治療，病情有好轉，可以出席公開活動接受訪問。

Photo from 林子博 Facebook

Shirley近日再度入院：「我出院喇！經過了6日終於可以出院！好感動！

Photo from 董燕君 Facebook

雖然呢次入院只係可以頭痛醫頭、腳痛醫腳！完全對我嘅病沒太大幫助！但係都好感恩遇到一班非常細心嘅專業團隊！其實現在公營機構水凖都好高，同以往差好遠，服務好似私家醫院咁！多謝你哋過去6日嘅照顧！

Photo from 董燕君 Facebook

交代返我嘅病情，我係因為上星期四早上突然右肋骨內痛（應該係肝位置），之後胃痛，痛到坐唔到、企唔到（痛到成個人攣埋，我估呢啲係叫做癌痛）！之後開始暈、作嘔、氣喘！頂了兩日到咗1/8夜晚去睇急症！醫生依家只係幫我用藥控制，暫時止痛、止暈！其實大部份比較強嘅止痛藥都有嗎啡成份！但係有嗎啡成份嘅嘢我食咗又會又暈又嘔！所以呢幾日就不停調教份量！

Photo from 董燕君 Facebook

其他實質嘅嘢醫生真係冇乜辦法可以做！我知道佢已經盡咗力！希望以後乖乖哋唔好再無端端咁痛啦！（我都知道好多嘢都要靠自己）不過真係好驚㗎！無助感真係好重！最後要同大家講聲唔好意思！過去幾日要你哋為我擔心！」

之前林子博表示太太試全新標靶藥，但副作用好大，有時更痛到落唔到床，最終都係要停藥。醫院開咗嗎啡水畀佢飲，希望可以減輕痛楚。

Photo from 林子博 Facebook

標靶藥費用昂貴，一個月要花兩萬。子博努力工作，密密接job賺錢：「總之對太太好就乜都得。」佢表示好多嘢佢做得唔夠，照顧得太太唔夠好，希望會有奇蹟出現。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）