【消委會零食測試】77款中逾9成驗出可致癌物質　薯片/蝦條/薯格通通有份

薯片、蝦條等零食係唔少人煲劇、打機、睇戲必備嘅零食之一，加上最近新冠肺炎疫情關係，大家留喺屋企嘅時間就更加多，食零食嘅機會就會增加，不過依啲零食除咗解饞同致肥之外，原來仲會帶嚟致癌風險。消委會測試咗市面 77 款預先及非預先包裝嘅香脆零食，發現當中 70 款含可致癌物質丙烯酰胺，逾3成樣本嘅丙烯酰胺含量更超出歐盟法規嘅基準水平。

消委會檢測咗市面上 67 款預先包裝香脆零食，包括 29 款薯片及薯條、13 款蝦片及蝦條、12 款粟米脆片及粟米條、7 款蔬菜脆片、3 款藜麥片、3 款番薯及甘薯類脆片；另外，仲有 10 款喺快餐連鎖店熱門嘅非預先包裝即食薯條、薯格及薯餅。

喺全部樣本中都檢出唔同含量嘅致癌物質丙烯酰胺，每公斤就有 12 微克至 2,614 微克，相差超過 216 倍。當中只有 7 款蝦片及蝦條樣本含量沒有超出每公斤 750 微克參考基準水平。

Photo from 消委會

丙烯酰胺其實係一種有廣泛工業用途嘅物質，被國際癌症研究機構歸類為「可能令人類致癌」（第2A組）。一些食品檢出丙烯酰胺，係因為天然存在於食材、處於游離狀態嘅還原糖（例如葡萄糖和果糖）與一種名為天冬酰胺（asparagine）嘅氨基酸，喺高溫下發生化學反應而產生。例如，游離天冬酰胺含量較高嘅薯仔，喺製造薯片、薯條類產品時，經油炸、烤焗等高溫（高於120°Ｃ）及少水份嘅程序，就會產生丙烯酰胺。

Photo from 消委會

檢測中9款嘅丙烯酰胺含量高於基準水平，而含量最高嘅日本製「Topvalu」Best Price Potato Chips Salt Flavor每公斤就達 2,614 微克，比基準水平每公斤 750 微克，超出近 2.5 倍。

Photo from 消委會

消委會同時測試10款非預先包裝即食薯條、 薯格及薯餅。各丙烯酰胺含量介乎每公斤 38 微克至 964 微克， 相差約 24 倍，其中含量最高嘅「Five Guys」Fries 達每公斤 964 微克，比基準水平高 90%。

另外，今次測試中亦檢出 55 款預先包裝零食樣本屬於高脂，當中以預先包裝薯片及薯條類最嚴重。香港生產嘅卡樂B宅卡B紫薯條(原味)總脂肪含量最高，每 100 克食物達 43.0 克，按產品建議食用分量17克計算，進食一份便攝取7.3克脂肪。

Photo from 消委會

整括而言，預先包裝嘅薯片、薯條丙烯酰胺平均含量，比非預先包裝嘅高；消委會提醒，無論預先包裝或非預先包裝嘅零食，其丙烯酰胺含量差距極大，為咗身體嘅健康都係少食多滋味。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）