照咗放大燈？！日本蜻蜓牌MONO擦膠造型隨行袋

日本人創意無限就唔少人都知，好多時只要你諗得出佢哋都有可能做得到，最新就有一本日本雜誌嘅贈品就為係送一個好似照咗放大燈嘅 MONO 擦膠造型萬用收納袋畀大家。

Photo from 寶島社

其實依間出版社「寶島社」一直都有推出唔少介紹人氣文具嘅雜誌嚟，而且有買過日本雜誌嘅大家都知，日本雜誌都有附書符送小禮物嘅習慣。今次佢哋預告喺 8 月 31 號推出嘅《MONO文具BOOK》，就會隨書附送印有 MONO 擦膠圖案嘅萬用收納袋。

Photo from 寶島社

Photo from 寶島社

MONO 擦膠嘅藍白黑間條紙套設計係蜻蜓牌依款擦膠嘅經典設計嚟，除咗設計深入民心，其輕鬆擦走錯字嘅亦係唔少學生選用嘅原因。

Photo from tombow

今次依個放大版 MONO 擦膠萬用收納袋可以作旅行收納袋、化妝包包、gadget 收納等用途，小編覺得依家依個年代，人手一部手提電腦，依個袋用嚟放置電腦滑鼠、Cable 線及火牛等小部件就啱晒喇！

至於雜誌《MONO文具BOOK》嘅內容方面，仲會介紹 MONO 擦膠嘅歷史以及各種不同系列，身為文具控嘅你當然唔可以錯過喇！

Photo from 寶島社

MONO文具BOOK
售價：¥1890＋稅
Size：約 W210 × H110 × D55 mm
發售日期：2020年8月31日

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）