周杰倫舊照被指「p過龍」 網民質疑天皇偶像包袱太重
一講起台灣天王周杰倫,大家除咗會諗起佢 lur 到爆嘅唱腔之外,當然仲會諗起佢嗰對招牌細眼。但近日喺網上流出嘅一張周董中學時期嘅相,入面嘅佢竟然被 p 到有對 bling bling 大眼?
Photo from weibo@周杰倫bot
呢張學生相喺內地微博瘋傳,相入面嘅周杰倫著住中學校服,留緊中分頭,睇落都好青澀。但周杰倫嘅膚色都白咗好多,一對單眼皮竟然變咗深邃嘅雙眼皮,睇得出對眼都放大咗唔少。相比之下,隔離嘅同學就睇落自然得多。
有啲網民就留言話覺得天王「p 過龍」,搞到張相完全唔似佢本人,亦有網民話佢「偶像包袱」太重,連 post 張舊相都要 p 圖。但都有網民好支持周杰倫,話佢中學嗰陣已經好靚仔!
Photo from weibo@周杰倫_bot
周杰倫可以話係愈大愈貪靚!其實今次唔係周杰倫第一次捲入p圖疑雲。周杰倫不時同老婆昆凌喺社交媒體放閃時都落重 filter,成個人唔單止白咗幾度之外,有次仲被網民捉到塊臉無啦啦凹咗一忽添!
Photo from facebook@周杰倫
Photo from instagram@jaychou
而當初喺昆凌仲陀緊第一胎嗰陣,一班網民都係咁集氣祝福話希望個女對眼會同媽媽一樣咁精靈同圓碌碌,唔好好似周杰倫咁單眼皮,就連周杰倫本人都曾經喺訪問嗰陣透露話希望個女會似媽媽。
相信今次都係周杰倫一時失手,重手咗少少啫!
Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)