【美國喜劇推介】5套必追sitcom 每集廿分鐘輕鬆煲劇 Netflix都有得睇！

By Charlie on 07 Sep 2020

Digital Content Writer

唔知大家會唔會好怕煲劇呢？一集 40 幾分鐘起跳，有時啲劇情太刺激緊張嘅話真係會煲到停唔到，搞到嘥咗好多時間？咁 sitcom 就啱晒大家啦開嚟送飯啦！

Sitcom 其實係「Situation Comedy」咁解，即係處景喜劇，每集其實唔會有太大嘅關聯，內容亦都相對貼近日常生活，香港嘅《愛回家》就係其中一個例子啦～

不過小編就嫌香港嘅 sitcom 太「乾淨」同正經咗啲，所以就傾向睇美國嘅 sitcom。唔好見佢哋好似有好多季咁就嚇怕咗，其實每一集都只係得廿分鐘左右，食完飯啱啱好完一集～以下小編就會向大家推薦認為最無厘頭、最搞笑嘅 5 套 sitcom，kill time 一流!

Brooklyn 99

故事主要係圍繞住「99 區」警局入面嘅人，主角 Jake 係警局入面嘅查案精英，但就成個大細路咁，成日闖好多禍，搞到成間分局啲人都好頭痕！而佢哋嘅隊長 Raymond 就係睇落好嚴肅，成日都唔笑，但喺「99 區」警局耐咗就開始同班手下一齊癲！想睇佢哋點樣用無厘頭嘅方法去破案，咁就一定要睇啦！套劇依家已經推出咗 7 季，而第 8 季就喺上年開始拍緊，希望佢哋快啲出啦～

Photo from imdb

2. How I met your mother

就咁睇套劇名都知呢套劇係主角 Ted 同佢啲仔女講同佢老婆相遇嘅故事，所以成套劇係用倒敘嘅方法去進行。不過其實佢老婆到最後一季先出現，成套劇嘅重點其實係佢自己同 4 個朋友嘅友情。因為套劇係 Ted 講述嘅記憶，所以中間會出現咗啲「記錯嘢」嘅情況！ 5 個朋友之間成日都會有唔同嘅約定／打賭，而佢哋賭注都好大，睇佢哋之間成日鬥嘴都覺得開心！套劇喺 2014 年已經完晒，大家可以放心追晒 9 季佢～

Photo from imdb

3. 2 Broke Girls

套劇係講述一個破咗產嘅有錢女 Caroline 去餐廳做侍應，結果就識咗一直窮開嘅 Max，最後仲做埋 roommate 同好朋友添！而佢哋每日畀心機返工就係為咗儲錢開一間賣蛋糕仔嘅鋪頭。套戲主要圍繞住餐廳嘅同事同鄰居，佢地零底線，成日都會講好多黃色笑話去互相性騷擾，再加埋因為 Max 出身寒微，所以佢成日都會用啲 mean 到爆嘅說話保護自己，但作為觀眾嘅我就會睇到好過癮好好笑！套劇喺 2017 年已經播完 6 季，你估下佢哋最後可唔可以實現到夢想呢？

Photo from imdb

4. The Office US

呢套劇相對上比較少人識，因為佢喺香港版嘅 Netflix 無得睇。佢以「紀錄片」嘅形式記載咗一間賣紙公司嘅運作，例如佢地會有人影低老細同員工之間發生嘅事，又會分別訪問佢哋嘅睇法。演員都唔係啲咩靚仔靚女，甚至你可能會覺得有啲生口面，但呢個就好似每個打工仔嘅返工環境咁！套劇喺 2013 年已經播完 9 季，後尾更加被德國、加拿大翻拍過，所以個劇本真係唔錯㗎！

Photo from imdb

5. Friends

講到 sitcom 神劇就梗係唔少得 friends 啦，經典嘅六人行已經係友情嘅代表，而因為彼此都好好朋友，所以互相開玩笑呀、串對方已經係閒事，而佢哋之間發展嘅愛情線都好受人關注！套劇喺 2004 年已經播完 10 季，陪咗一代人嘅青春之餘，新一代都可以更加了解 90 年代嘅美國，亦會見到好多巨星都曾經客串過小角色，種感覺都幾搞笑！