【Sulli 雪莉逝世一週年】電視台公開紀念紀錄片　家人及圈內好友回顧生前點滴

韓國藝人 f(x) 前成員 Sulli 雪莉 於 2019 年 10 月 14 日離開咗大家，唔經唔覺已接近一年。韓國電視台 MBC 近日播出雪莉嘅紀錄片《Docuplex》，訪問中雪莉嘅家人同圈內好友，回顧雪莉嘅演藝生涯、生前點滴，懷緬一條年輕生命嘅喪失。

Photo from MBClife@youtube

雪莉生前因為身體力行支持「no bra」同埋喺網上直播時作風大膽而飽受爭議，成為網民攻擊對象，活喺焦點之下，最終因抑鬱症，自殺身亡，終年 25 歲。

Photo from jelly_jilli@ig

紀錄片中，播放咗雪莉喺練習生時嘅點滴同佢當時嘅獨白，以及訪問咗雪莉嘅媽媽同圈內好友，包括少女時代成員 Tiffany。雪莉媽媽亦都係首次曝光，親身談及喪女之痛。雪莉媽媽提及喺雪莉同前男友崔子嘅戀愛傳聞出現之前，一家人都非常幸福快樂，坦言當時接受唔到雪莉同年長13年嘅崔子拍拖，認為兩人嘅生活模式相差太遠，雪莉戀愛後更同屋企人 5 年冇見過面，並提及雪莉喺 2016 年曾試圖自殺。

Photo from MBClife@youtube

影片一出隨即引起網民到崔子嘅社交媒體留言鬧爆崔子。後來製作團隊出面澄清，解釋因為節目時長關係而剪走咗雪莉媽媽感謝崔子嘅說話，雪莉媽媽感謝崔子帶畀雪莉一段開心幸福嘅回憶。

Photo from MBClife@youtube

雪莉生前曾經擔任過韓國節目《惡評之夜》嘅主持人，親自讀出同回應惡評，實在難以想像當時嘅雪莉到底花咗幾多勇氣去正面回應眾多嘅惡評。佢曾經喺節目上講過其他人對於自己最好奇嘅地方應該就係「我到底係咪真係一個瘋女人？」佢講完之後大笑，但其實笑容嘅背後係受傷同無奈，令人心痛。

Photo from MBClife@youtube

Photo from MBClife@youtube

雖然紀錄片嘅播出引起咗好多爭議，但重點應該放番喺雪莉身上，惋惜一顆星星嘅殞落，更加重要嘅係去鼓勵大家正視內心嘅自己，努力、勇敢地過好每一天。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）